Thursday, January 28, 2016

မှတ်မိသမျှ ပေါက်ကရ- ၂



၆ လကြီး ၆ လငယ်



  ရန်ကုန်မြို့ အထင်ကရ ဟော်တယ်တစ်ခုတွင် M&E Engineer ဘဝဖြင့် အလုပ်လုပ်ခဲ့စဉ်က ဖြစ်သည်။
ကျနော်တို့ အဖွဲ့တွင် နေရာတကာ အားကိုးရသော အလုပ်သမားတစ်ယောက် ရှိသည်။ တိုင်းရင်းသားထဲက ဖြစ်၍ အသားဖြူသော သူ့ကို အသားမဲသော ကျနော်တို့ အင်ဂျင်နီယာများက တရုတ်ကြီးဟု ခေါ်သည်။ တရုတ်ကြီးက ပညာအရည်အချင်း ၄ တန်းအထိ ဆိုလား တက်ဖူးသည်ဟု သူပြောသည်။ စာရေးစာဖတ်တတ်သော်ငြား သိပ်အများကြီးတော့ မဟုတ်။

ကျနော်တို့ အဖွဲ့မှာ သူက တောက်တိုဟု ဆိုနိုင်သော်လည်း မရှိမဖြစ် တရုတ်ကြီးဖြစ်သည်။ အင်ဂျင်နီယာတွေက ပညာတတ်သော်ငြား တချို့အလုပ်တွေဆို ပေကပ်ကပ် လုပ်တတ်ကြသည်မို့ တရုတ်ကြီးကသာ အပြေးအလွှားလုပ်ရသည်ချည်း။

တစ်ရက်တော့ ထမင်းစားရင်း ရောက်တတ်ရာရာ ပြောကြသည်။

"တရုတ်ကြီး…. မင်း မောင်နှမ ဘယ်နှစ်ယောက် ရှိသတုန်း…"

"၂ ယောက်ဗျ…. အစ်မတစ်ယောက် ရှိသေးတယ်…."

အဲဒီအထိက အကောင်း…. တရုတ်ကြီး ဆက်ပြောလိုက်သော စကားကြောင့် ကျနော်တို့ တစ်ဖွဲ့လုံး ထမင်းပင် နင် ချင်သွားသည်။ သူပြောလိုက်တာက…

"ကျနော့ အစ်မနဲ့ ကျနော်က ၆ လကြီး ၆ လငယ် လေ…".. တဲ့။

ဒီတော့ အဲယားကွန်း အင်ဂျင်နီယာက ဝင်ထောက်သည်။
"သြော်…. မောင်နှမအရင်း မဟုတ်ဘူးပေါ့…."

"မောင်နှမ အရင်းပါဗျ…"
တရုတ်ကြီးက မလျှော့။

ကျနော်လည်း ဝင်ပြောရတော့သည်။
"ငင်…. မဟုတ်သေးဘူးလေ တရုတ်ကြီးရဲ့…. မင့်ဟာ မောင်နှမ အရင်းက ဘယ်နှယ်လုပ် ၆ လကြီး ၆ လငယ် ရှိမလဲဟ…."

"မောင်နှမ အရင်းပါဗျ… ၆ လကြီး ၆ လငယ်ပါ…"

မန်နေဂျာလည်း မနေနိုင်တော့ ဝင်ပြောပြန်သည်။
"မင်းကလည်း…. လုပ်တော့မယ်... မင်းအစ်မကို မွေးပြီး ချက်ချင်း ကိုယ်ဝန်ပြန်ယူရင်တောင် အနည်းဆုံး ၁ လ ၂ လတော့ ကြားမှာ ခြားဦးမယ်…. ပြီးတော့ မင်းအမေ ဗိုက်ကြီးနဲ့ မင်းကို အစောဆုံးမွေးရင် ၇ လ ပေါ့ကွာ… အားလုံးပေါင်း မင်းအမေဗိုက်ကို ဇစ်တပ်ပြီး မွေးတောင် မင်းအစ်မနဲ့ မင်းနဲ့ ၉ လ တစ်နှစ်တော့ ခြားမှာပေါ့ဟ…."

တရုတ်ကြီးက ခေါင်းကုတ်ရင်း စဉ်းစားသည်။ ပြီးတော့မှ တွေးတွေးဆဆ ဆိုသည်။
"မဟုတ်ဘူးဗျ…. ၆ လကြီး ၆ လငယ်ပဲ…"

ကဲ… မင်းပဲ ရှင်းပြပါဦး… ဆိုတော့လည်း…
"မသိဘူး…. ဒါပေမဲ့ ၆ လကြီး ၆ လငယ် ပဲ…".. တဲ့။

နောက်ဆုံး ကျနော်သာ ဟော်တယ်အလုပ်ကနေ ထွက်လာခဲ့တယ်။
တရုတ်ကြီးကတော့ သူ့အစ်မနဲ့ ၆ လကြီး ၆ လငယ်ပဲ။
ဒလက တရုတ်ကြီးကို လက်ခံအောင် ရှင်းပြနိုင်တဲ့သူရှိရင် ပြောဗျာ...။
KFC ကျွေးမယ်.....။

*********************************

ဆက်ဆီပရောဒတ်




ဟော်တယ်မှာ အလုပ်လုပ်တော့ ထမင်းစားချိန် ကျနော်တို့ရဲ့ စကားဝိုင်းက တခါတရံ မှတ်စရာသားစရာလေးတွေ ရတတ်သည်။ အဲဒီနေ့ကလည်း ထုံးစံအတိုင်း စားပြီးသောက်ပြီး မထသေးဘဲ လေပေါကြသည်ပေါ့။

ကျနော်တို့ထဲက ဟော်တယ်ကားမောင်းသည့် အသက်အကြီးဆုံး အစ်ကိုကြီးက လူသုံးကုန်ပစ္စည်းတွေ အကြောင်းပြောရင်း…..

"ပရောဒတ် (Product) တွေထဲမှာ Sexy Product ဆိုတာ ရှိတယ်ကွ….".. ဟု စကား စ သည်။

Sexy ပရောဒတ်ဆိုတော့ ကျနော်တို့အားလုံး စိတ်ဝင်စားသွားကြသည်။ နိုင်ငံခြားပြန် မန်နေဂျာက ဝင်ထောက်သည်။ ဒီကားဆရာကြီးက သူပြောလျှင် တစ်ခါမှ မကြားဖူးတာတွေ ပါလာတတ်သမို့ ကျနော်တို့က ဆရာကြီးဟုပင် ပညတ်ကြသည်။

"လုပ်စမ်းပါဦးဗျ…. ဘယ်လိုမျိုးတုန်း… နိုင်ငံခြားမှာ ရောင်းတဲ့ Sex Toy တွေကို ပြောတာလား…."

"မဟုတ်ပါဘူးဗျ… အဲလို အတုံးလိုက် အတစ်လိုက်ကြီး မဟုတ်ဘဲ လူတွေ ပုံမှန် သုံးနေတဲ့ မြင်နေကျတွေထဲမှာကိုပဲ ရှိတာ…. ပြီးတော့ အဲဒါမျိုးတွေက ရေရှည်ခေတ်စားတယ်ဗျ…."


"ဟ…. အဆန်းပါလား…. လုပ်စမ်းပါဦး…"


"လိပ်ခုံးကားလို့ ကျနော်တို့ခေါ်တဲ့ ဗောက်စ်ဝက်ဂွန်ကားကို ကြည့်ဗျာ…. အဲဒါ ဆက်ဆီ ပရောဒတ်ပဲ…"


"ဟမ်….. ကြား…ကြားဖူးပေါင်ဗျာ…. ဗောက်စ်ဝက်ဂွန်က ဆက်ဆီဖြစ်ရတယ်လို့…"
မန်နေဂျာက အံ့သြဟန်နှင့် ဆိုသည်။


ကျနော့မျက်စိထဲမှာ ကျနော်ငယ်စဉ်က အလွန်ကြိုက်သော Herbie Goes Bananas ရုပ်ရှင်ကားထဲမှ ချစ်စရာ Volkswagen ကားလေးကို ပြေးမြင်မိသည်။ မော်ဒယ်အပြည့်အစုံမှာ Volkswagen Beetle ဖြစ်သည်။ ကျနော်တို့ဆီမှာတော့ လိပ်ခုံးကားဟုသာ ခေါ်ကြပါသည်။ ဆရာကြီးက…






။ ဒီလိုဗျ…. ဒီကား ဒီဇိုင်းဖြစ်လာပုံ ဇာတ်လမ်းရှိတယ်…  ဟု အစချီကာ ဆက်ဆီကျသော ဗောက်စ်ဝက်ဂွန်အကြောင်းကို အောက်ပါအတိုင်း မိန့်ပါသည်။

"အဲဒီတုန်းက ဂျာမဏီမှာ ကားစျေးတွေက ကြီးတယ်မို့လား…. ကား ဆိုတာ ချမ်းသာတဲ့သူမှ စီးနိုင်တာကိုး…

အဲဒီမှာတင် ဂျာမန်ကား ကုမ္ပဏီတွေဟာ စားရိတ်သက်သာပြီး သာမာန်အလုပ်သမား လူတန်းစား စီးနိုင်မဲ့ ကားဒီဇိုင်းမျိုးကို အပြိုင်အဆိုင် ထုတ်ဖို့ ကြိုးစားကြတယ်ဗျ…."

"ဗောက်စ်ဝက်ဂွန်ကုမ္ပဏီက ဒီဇိုင်နာ အဖိုးကြီးကလည်း ကားဒီဇိုင်းကို အမျိုးမျိုး စဉ်းစားပေမဲ့ ဒီဇိုင်းက စဉ်းစားလို့ မရဖြစ်နေသတဲ့ဗျ…. အဲဒါနဲ့ နေ့လည် ထမင်းစားချိန်ရောက်တော့ အိမ်ပြန်ပြီး ထမင်းစားသတဲ့ဗျ…. "

"ဂျာမန်တွေက ထမင်းစားတာလား… ပေါင်မုန့်စားတာလား…."
လျှပ်စစ်အင်ဂျင်နီယာက ဝင်ထောက်ပြန်သည်။

"ဘာစားစားကွာ…. မင်းကလဲ တစ်မျိုး....."
အဲယားကွန်း အင်ဂျင်နီယာက ကျွဲမြီးတိုဟန်ဖြင့် ထ ဟောက်သည်။

ဆရာကြီးက မျက်မှန်ကို တစ်ချက်ဝင့်ရင်း ခဏရပ်သွားတော့ လျှပ်စစ်သမားက ကွမ်းယာတစ်ယာကို ပုဆိုး ခါးပိုက်ထောင်ထဲမှ ထုတ်ပေးလိုက်သည်။ ကွမ်းယာကို ပါးစပ်ထဲထည့်လိုက်ရင်း…

"အဲဒီလို အိမ်ပြန်ပြီး ထမင်းစားပေမဲ့ ကားဒီဇိုင်းကိစ္စ ခေါင်းထဲရောက်နေတော့ သူက ထမင်းကို ဖြောင့်ဖြောင့်မစားနိုင်ဘူး ဖြစ်နေတာပေါ့…."...

အဲဒီမှာတင် သူ့မိန်းမက
ရှင် ဘာဖြစ်နေတာတုန်း… ပေါ့။

သူကလည်း ဒီလိုဒီလို ပေါ့လေ…. ကားဒီဇိုင်း ပြဿနာတက်နေလို့ပါပေါ့။

သူ့မိန်းမက ပြောတယ်။
စားစရာရှိတာ စားစမ်းပါရှင်။ ပြီးတော့မှ ကားဒီဇိုင်းအကြောင်း ပြောတာပေါ့။ ကျမ ကူညီပါ့မယ်လို့ ဆိုသတဲ့။

အဲဒါနဲ့ နေ့လည်စာ စားလို့လည်းပြီးရော သူတို့ အနောက်တိုင်းက လူတွေထုံးစံအတိုင်း မိန်းမကို ဖက်ပြီး ဟိုကိုင်ဒီကိုင် ကိုင်သတဲ့။ အဲဒီမှာတင် အောက်ဖက်ကို လက်ရောက်သွားတော့ မိန်းမက….
ကားဒီဇိုင်းကို မကိုင်နဲ့လေ… လို့ ပြောသတဲ့။

အဲဒီမှာတင် ဒီဇိုင်နာကြီးလည်း အိုင်ဒီယာတွေ ထင်းကနဲ လင်းကနဲ ဖြစ်ပြီး ဒီဇိုင်းထုတ်လိုက်တာ အခုထိ နာမည်ကြီးနေတဲ့ ဗောက်စ်ဝက်ဂွန် လိပ်ခုံးကား ဖြစ်လာတော့တာပဲကွ…. ဆိုပဲ။

ကျနော်တို့အားလုံး ပြုံးစိစိ လုပ်နေကြတော့ ဆရာကြီးက ဆက်ပြောလိုက်သေးတယ်။
"ပိုတူသွားအောင် အလယ်မှာ လိုင်းလေးတောင် ထည့်ပေးထားသေးတယ် မဟုတ်လား…." တဲ့


အဲဒီကားလေးတွေကတော့ ဒီနေ့ခေတ်ထိ မတိမ်ကောတာ အမှန်။ အခု နောက်ဆုံးပေါ် ကားတချို့ထက်ပင် အဲဒီကားလေးတွေက စျေးကြီးနေသေးသည်က မျက်မြင်။ ဗောက်စ်ဝက်ဂွန်ကလည်း မျိုးဆက်သစ် ဒီဇိုင်းသစ် Beetle မော်ဒယ်လ်တွေ ထပ်ထုတ်ပါသည်။ သို့သော် Original ပစ္စည်းတွေချည်း တပ်ထားသည့် မူလလက်ဟောင်း Volkswagen Beetle လိပ်ခုံးကားကလေးတွေဆို စျေးက အော်ပျံလန်နေမြဲ။

သူပြောသည့် Volkswagen Beetle ဇာတ်လမ်း တကယ် ဟုတ်မဟုတ်တော့ ကျနော်မသိ။ အဲဒီကားဒီဇိုင်းကလည်း သူပြောတာ ဟုတ်တုတ်တုတ်။ သေချာကြည့်လေ ဟုတ်သလိုလိုရှိလေ ဖြစ်သည်။

ကျနော်ဖြင့် ခုထိ သူပြောသည့် ဇာတ်လမ်းကို ခုထိ ဇဝေဇဝါ ဖြစ်တုန်း……။

"အာ့… ဂယ်ဂျီးလား…ဟင်…"

(သရုပ်ဖေါ်ပုံများကို Google မှ ယူသည်။)

Friday, January 22, 2016

မှတ်မိသမျှ ပေါက်ကရ


ကြင်နာလွန်းသူကြီး


တစ်ခါက တရားရုံးသို့ လင်မယားကွာရှင်းမှုတစ်ခု ရောက်လာသည်။
မယားဖြစ်သူမှ ကွာရှင်းခွင့်တောင်းခြင်း ဖြစ်သည်။

တရားသူကြီးမှ မေးသည်။

"မိန်းကလေး….. မင်းခင်ပွန်းကို ဘာဖြစ်လို့ ကွာရှင်းချင်ရတာလဲ….
မင်း ခင်ပွန်းက အရက်အရမ်း သောက်လို့လား…"

တရားလို မိန်းကလေးက ပြန်ဖြေသည်။
"မဟုတ်ပါဘူး တရားသူကြီးမင်းရှင့်…."
.......

"လောင်းကစား လုပ်လို့လား…."

"မဟုတ်ပါဘူး တရားသူကြီးမင်းရှင့်…."

"ဒါဖြင့် သူက မင်းကို မကြင်နာလို့များလား…."

"မဟုတ်ပါဘူး တရားသူကြီးမင်းရှင့်…. သူက သိပ်ကြင်နာတတ်ပါတယ်…."

တရားသူကြီး အံ့သြသွားသည်။

"ဟေ…. ဒါနဲ့များ ဘာဖြစ်လို့ ကွာရှင်းချင်ရတာတုန်း…."

 "ကြင်​နာတတ်လွန်​းလို့ကို ကွာချင်​တာပါ....."

တရားသူကြီးမှ မျက်လုံးပြူးလျက်....

"ရှင်းပြပါဦး..."

တရားလိုမှ ပြန်ဖြေသည်။

"ဒီလိုပါရှင့်…. သူက ကျမ ကိုချည်း ကြင်နာတာ မဟုတ်ဘဲ ကျမ အစ်မတွေ ညီမတွေကိုပါ အကုန် လိုက်ကြင်နာနေလို့ ကြင်နာလွန်းတဲ့ဒဏ်ကို သည်းမခံနိုင်တော့လို့ပါ….." ဟူ၏။

*******************************

တင်းလွန်းလို့

သွားဆရာဝန်တစ်ယောက် ဒေါကြီးမောကြီးနှင့် လျှောက်လာသည်။ လမ်းတွင် တွေ့သမျှ ခဲလုံးများ အပင်ငယ်များကို ကန်ထုတ်ပစ်နေသည်။ မိတ်ဆွေတစ်ယောက်က သူ့ကို မြင်သွားသည်။

"ဆရာ…. ဘာတွေများ ဒီလောက်တောင် ဒေါခီးနေတာတုန်းဗျ…."

"ဟိုတလောက ကျုပ်ဆီမှာ သွားနှုတ်ပြီး ပြန်စိုက်သွားတဲ့ ကောင်ပေါ့ဗျာ…"

"အင်းလေ…. အဲဒါ ဘာဖြစ်လို့တုန်း…"

"ပိုက်ဆံ မရှိလို့ အကြွေးနဲ့ နှုတ်ပေး… အကြွေးနဲ့ စိုက်ပေးလိုက်တာဗျ…."

"ဆရာက အတော် သဘောကောင်းတာပဲ.... အခု သူက ဘာပြောလို့လဲ…"

"အခု ပိုက်ဆံသွားတောင်းတော့ မပေးနိုင်ဘူးလို့ ပြောလွှတ်တယ်ဗျ…."

မိတ်ဆွေက တရားချဖို့ ကြိုးစားသည်။
"သြော်…. ဆရာရယ် … ဆရာ့အနေနဲ့ ဒီငွေ လောက်ကလေးနဲ့ ဘာမှ ဖြစ်မသွားပါဘူး….. ဒီလိုလူတစ်ယောက်ကိုလည်း ဂရုစိုက်မနေပါနဲ့ဗျာ…."

"ဟမ်…. ကျုပ်က အဲဒီ ပိုက်ဆံမရတာကို တင်းတာ မဟုတ်ဘူးဗျ…. ကျုပ်စိုက်ပေးထားတဲ့သွားနဲ့ ကျုပ်ကို ပြန်ပြီး အံကြိတ်ပြတာကို တင်းတာဗျ…. တင်းတာ…. တောက်စ်…."


 *******************************

လူမရွေးဘူး



facebook မပေါ်သေးသောခေတ်က ဖြစ်သည်။

ကောင်မလေးတစ်ယောက် လျှောက်လာသည်။
ကောင်လေးတစ်သိုက်က မြင်သည်နှင့် နောက်က လိုက်လာပြီး ရည်းစားစကား ပြောသည်။
ကောင်မလေးက သုတ်သုတ်လျှောက်သည်။ သူ့အိမ်ကို လှမ်းမြင်နေရသည့်နေရာသို့ ရောက်လာသည်။ အိမ်ပေါက်ဝတွင် သူ့အစ်မတွေ ထိုင်နေတာကို တွေ့သည်။ သူလှမ်းပြီး လက်ပြလိုက်သည်နှင့် အခြေအနေကို သဘောပေါက်သွားသော ညီအမတွေ သူ့ဆီ စစ်ကူရောက်လာကြသည်။

စစ်ကူတွေ လာပြီဆိုတော့ လူငယ်တစ်သိုက် နည်းနည်းတွန့်သွားသည်။ ကောင်မလေးက အောင်နိုင်သူရဲ့ အသံနှင့်....
"ဟဲ့… ကောင်တွေ… နင်တို့က ငါ့ကို ဘယ်လို အစားမျိုး ထင်နေလို့လဲ…"

"သိဝူးလေ...."

အစ်မလတ်က ဝင်ထောက်သည်။
"ဟင်…. ကိုယ့်ရုပ်ကိုမှ အားမနာ…. ငါ့ညီမနဲ့ တူသလား တန်သလား…"

"မတန်လို့ ပြန်ပို့ရတယ်ဆိုတာ မရှိပါဘူး အစ်မကြီးရယ်....."

အစ်မကြီး စိတ်ထဲမှ ဒေါသတွေ အလိပ်လိုက်တက်လာသည်။ ဒီလို ကောင်တွေကများ ငါ့ညီမကို ရာရာစစ.... တွေ့ကြသေးတာပေါ့... ငါ့တို့ လက်က ပါးမရွေးဘူးဆိုတာ ဒင်းတို့ကို ပေါ်တင်ကြေငြာမှ ဖြစ်တော့မယ်.... ဟင်း...ဟင်း... ဒီမှာ.... တင်းတယ်...တင်းတယ်.... တင်းတယ်ဟေ့...

ဒေါသအလိပ်လိုက် အတောင့်လိုက် ထွက်လာသည့်အဆုံး ၇ သံချီ အော်ထည့်လိုက်တော့သည်။

"ဟေ့….. ငါတို့ကို ဘယ်လိုအတန်းအစားများ မှတ်နေသလဲ…
တို့ပါးက လူမရွေးဘူးဟေ့….." တဲ့။

************************

မရိုင်းနဲ့

 

ရပ်ကွက်ထဲတွင် တစ်အိမ်နှင့်တစ်အိမ် ခြံချင်းကပ်နေခြင်းကြောင့် လည်းကောင်း၊ သစ်သားအိမ်၊ ထရံကာအိမ်များ ဖြစ်ခြင်းကြောင့်လည်းကောင်း တစ်ဖက်အိမ်က ပြောသမျှ တစ်ဖက်အိမ်က ကြားနေရသည်။

တစ်နေ့…
ကျနော်တို့နှင့် ခြံချင်းကပ်လျက်အိမ်မှ သားအဖ ၂ ယောက် စကားပြောနေသည်ကို ကြားရသည်။
အဖေက သားကို ဆုံးမနေခြင်း ဖြစ်သည်။

"ဟေ့ကောင်..... မင်းက အဖေလား…. ငါက အဖေလား…"

"အဖေက အဖေပေါ့ဗျ…"

"ဒါဆို မင်း ငါ့စကား နားထောင်ရမှာပေါ့ကွ…. ငါအဖေက ဝါးလုံးမြင်လျက်သားနဲ့ ဝါးခြမ်းဆို ခြမ်းလိုက်ပေါ့ကွ…. အခုတော့ မင်းက ငါက ဒါဆို မင်းက ဟိုဟာ..."


သားဖြစ်သူကလည်း အညံ့မခံ…။

"မခြမ်း နိုင်ပါဘူး… ဝါးလုံးက ဝါးလုံး… ဝါးခြမ်းက ဝါးခြမ်းပေါ့…."

''တယ်…. ဒီကောင်လေးတော့ သေတော့မယ်…"


"သေသေဗျာ…. ဒီသောက်လုပ်တွေလည်း မခိုင်းနဲ့ဗျာ…. မလုပ်နိုင်ဘူး…"


အဲဒီမှာတင် အဖေက ဒေါသတကြီး ထ ဟောက်လိုက်တာက…

"တယ်…. ဒီကောင်လေးဟာ…. စကားပြောရင် ဆဲ ဆဲ မပြောပါနဲ့လို့ ဆိုနေ…. ဒီ နာရိုးမတားလေးဟာ….".. တဲ့။

အံမယ်.... ဒါတောင် သားလုပ်တဲ့သူက မရပ်သေးဘူး.... ပြန်ပြောဖြစ်အောင် ပြောသေးတယ်.... ဘာတဲ့...

"သိပါတယ် အဖေရာ.... ခဏခဏ ကြွားနေစရာ မလိုပါဘူး.."... တဲ့....။

အတီးခံရတာတောင် နည်းသေး..။

**************************

  မအ ဘူး မထင်နဲ့

 

မြို့ပေါ်သို့ အလည်သွားမည့် အူတူတူ အ တ တ သမီးကို အမေက မှာသည်။
 
"ဟဲ့…. သမီး…. ဟိုရောက်ရင် တစ်ယောက်တည်း လျှောက်လျှောက် မသွားနဲ့နော်…."

"အင်းပါ…. သိပါတယ် အမေရဲ့…."

"နင်က အူတူတူ အ တ တ မို့ ငါက စိတ်မချလို့ ပြောနေတာဟဲ့…. တော်ကြာ မြို့ပေါ်က လူလည်တွေက နင့်ကို ရောင်းစားသွားလိမ့်မယ်…."

သမီးကလည်း အမေစိတ်ချအောင် ပြန်ပြောရှာပါတယ်။

"စိတ်ချပါ အမေကလဲ…. စိတ်ပူစရာ မလိုပါဘူး….. သူတို့က ချိန်ခွင်ပေါ် တက်ခိုင်းတိုင်း သမီးက တက်ပါ့မလား အမေရဲ့…." တဲ့။


အမေလည်း စိတ်ပျက်လက်ပျက်နဲ့.....


"နင့်တော့ ငါမနိုင်တော့ဘူး....." ဆိုတော့....


သမီးကလည်း မျက်နှာငယ်လေးနဲ့....


"မနိုင်ရင်လည်း မချီနဲ့ပေါ့ အမေရယ်....." ....တဲ့။

*****************************

ကျွတ်သွားတယ်


ဟိုးရှေးရှေးတုန်းက ကောင်မလေးများကို ကြိုက်လျှင် ရည်းစားစာပေး၊ ရည်းစားစကား လိုက်ပြောရသောခေတ်က ဖြစ်သည်။

လှတပတ ကောင်မလေးတစ်ယောက် လမ်းလျှောက်သွားနေသည်။ ကောင်လေး ၃ ယောက်က နောက်က လိုက်လာသည်။ တစ်ယောက်က...

"မင်းတို့ နောက်က ကြည့်နေ.... ငါ သွားတွန်းလိုက်မယ်..."

သူငယ်ချင်း ၂ ယောက်ကလည်း အားတက်သရော ထောက်ခံသည်။

"မင်းအစွမ်းအစကို ကြည့်ရသေးတာပေါ့...."

ပြောပြောဆိုဆို ရှေ့ကို အပြေးကလေးသွားပြီး ကောင်မလေးနား ကပ်လျက်လျှောက်လိုက်သည်။

"ဟေ့... တစ်ယောက်တည်းလား...."

ကောင်မလေးက နားမကြားသလို ခပ်သုတ်သုတ် ဆက်လျှောက်သည်။

"တစ်ယောက်တည်းလားလို့....."

ကောင်မလေးက ဘေးကို လှည့်ပြီး မှုန်ကုပ်ကုပ်ကြည့်သည်။ ဘာပဲပြောပြော လှည့်ကြည့်သည်ဆိုတော့ အားတက်သွားသည်။

"စိတ်ဝင်စား လို့ပါ...."

ကောင်မလေးဆီက အသံထွက်လာသည်။

"စား.. ဘရားပေါ့...."

 "အွန်..."

ကိုယ်တော်မြတ် နည်းနည်းတော့ ဖုသွားသည်။

".. ကြိုက်လို့ပါ...."

"ကြိုက်... ဘရိုက်ပေါ့..."

"ငင်.... ဟုတ်ဝူးလေ.... တကယ် ချစ်လို့ ပြောတာပါ...."

ကောင်မလေးက မရယ်မပြုံး မိန့်သည်။

"ချစ်... ဘရစ်ပေါ့...."

ဘာဆက်ပြောရမှန်း မသိတော့သော မောင်မင်းကြီးသားလည်း အသာလေး နောက်ချန်နေရစ်ရင်း သူ့ဘော်ဒါတွေကို ပြောသည်။

"ကျွတ်တယ်ကွ...".....တဲ့...

သူငယ်ချင်းကလည်း ပြုံးစိစိနဲ့ ကြည့်ပြီး ပြောလိုက်တာက...

"ကျွတ်.... ဗလွတ် ပေါ့ကွ...." ဆိုပဲ။

ဘုရားစူးရပါစေ့။ အခုပြောသော စကားများသည် ဟိုတုန်းက လမ်းသရဲစကားမာျး ဟူသတတ်။

(သရုပ်ဖေါ်ပုံများကို Google မှ ယူသည်။)

Tuesday, January 19, 2016

ဘုရားသခင် တရားမစီရင်ပါ








ဖတ်ခဲ့တာတော့ ကြာခဲ့ပါပြီ။ မဂ္ဂဇင်း ဝတ္ထုတိုလေးတစ်ပုဒ် ပါပဲ။ ဝတ္ထုနာမည်လည်း ကျနော် မမှတ်မိပါ။ ရေးသူကိုလည်း မသိ။ အကြောင်းအရာ လုံးစေ့ပတ်စေ့ မှတ်မိတာမျိုးလည်း မဟုတ်။ နှစ်သက်မိသည့် အချက်တစ်ချက်ကိုသာ အခုထိ မမေ့နိုင်တာဖြစ်သည်။ မှတ်မိသလောက် အကြမ်းဖျင်းလေးကို ဖတ်ကောင်းအောင် နည်းနည်းရေးပြပါရစေ။

နာမည်ကြီး လူသတ်သမားတစ်ယောက်ကို ရဲတွေဝိုင်းဖမ်းကြသည်။ ဒီလူသတ်သမားက Series killer ဟု ခေါ်ရလောက်အောင် လူတွေအများကြီးကို သတ်ခဲ့သည့် လူသတ်သမား။ နောက်ဆုံး ရဲက သူ့ကို အသေဖမ်းမိသည်။ ဒါတောင် သူ့ကိုဖမ်းသည့်ရဲကို သူ ရအောင် ပစ်သတ်လိုက်သေးသည်။ သို့ပေမဲ့ ရဲကလည်း မသေခင် သူ့ခန္ဓာကိုယ်ထဲကို ကျည်ဆံ ၆ တောင့် ပစ်သွင်းသွားခဲ့သည်။ သို့နှင့် သူ့ကို အသေဖမ်းမိလိုက်ကြသည်။

သူ သတိရလာတော့ တရားခွင်တစ်ခုက တရားခံဝက်ခြံလေးထဲ ရောက်နေသည်ကို အံ့အားသင့်စွာတွေ့ရသည်။ 

 

လူမျိုးစုရေးရာ ပဋိပက္ခများ (အပိုင်း-၇)

(၂) Federalism   ဖယ်ဒရယ်ဝါဒနဲ့ ပတ်သက်ပြီး အဓိပ္ပာယ်ဖွင့်ဆိုရာမှာ ဖွင့်ဆိုချက်နည်းလမ်းတွေအပေါ်မှာ မူတည်ပြီး ရှုပ်ထွေးမှုတွေရှိကြောင်း...