ယုံကြည်ခဲ့ဖူးသလား

ကိုယ့္ဘဝ

အောင်မြင်တဲ့ Team Work ရဲ့ အရေးကြီးတဲ့ အစိတ်အပိုင်းတစ်ခုက ယုံကြည်မှု (Trust) ဖြစ်ပြီး Team Work ကို ကျရှုံးစေတဲ့ ပြဿနာတစ်ခုက Suspect (သံသယ) ပါ။ ဘယ်စာအုပ်ထဲကမှ မဟုတ်တဲ့ ကိုယ်တွေ့အတွေ့အကြုံ သေးသေးလေး တစ်ခုကို ပြောပြပါရစေ။


တစ်ရက်တော့ Client တွေနဲ့ အင်ဒိုနီးရှား Batam anchorage မှာ ရပ်ထားတဲ့ Barge တွေကို Inspection ဝင်ပါတယ်။ ရပ်ထားတဲ့နေရာက ရေလယ်မှာဆိုတော့ သင်္ဘောကျင်းက စီစဉ်တဲ့ Nemo boat လို့ခေါ်တဲ့ Service boat ကို အားကိုးရပါတယ်။ ဒါပေမဲ့ ပြဿနာက အဲဒီ Nemo တစ်စီးတည်းနဲ့ အဲဒီနားက ရှိရှိသမျှ သင်္ဘောပေါင်းစုံကို သွားကြပြန်ကြဆိုတော့ တခါတရံ အခန့်မသင့်ရင် တစ်နာရီ၊ နှစ်နာရီလောက်ထိ စောင့်ရတတ်ပါတယ်။ ရေထဲမှာ အလုပ်လုပ်ရတာ ကုန်းပေါ်မှာလို စိတ်သွားတိုင်း ကိုယ်မပါ ပါဘူး။ တစ်နေရာနဲ့ တစ်နေရာ မြင်နေရပေမဲ့ ကူးဖို့ လှေမရှိရင် ဘာမှ လုပ်မရဘဲ ငုတ်တုတ် အချိန်ကုန်တဲ့ကိစ္စပါ။

ကျနော့အတွက် အချိန်က အရေးကြီးသမို့ တစ်မျိုးကြံရပါတယ်။ အဲဒီ ရေလယ်ခေါင် သောင်ထွန်း Teras ကျွန်းမှာ ကျနော်တို့ Teras ကုမ္ပဏီပိုင် Tug boat တချို့လည်း ရပ်ထားတာ ရှိပါတယ်။ ဒါနဲ့ သင်္ဘောကျင်းကို ခွင့်တောင်းပြီး ကျနော်တို့ Tug boat တစ်စီး က Workboat လို့ခေါ်တဲ့ စက်တပ်ရာဘာလှေကို ကျနော်တို့ အသွားအပြန်အတွက် စီစဉ်ရပါတယ်။ (မမြင်ဖူးသူတွေအတွက် ပုံလေးတွေ ထည့်ပေးထားပါတယ်။)

Nemo Boat ေလးကို အားျပဳႀကရတယ္

အရေးထဲ ကပ္ပတိန်က သူ့ Workboat ကို ပေးမသုံးချင်ဘူး။ ဘာကြောင့်လဲလို့ မေးလိုက်တော့ မြန်မာပြည်က အထာမျိုး လာလုပ်နေတာ။ Inspection လာရင် ပြဖို့ ဆိုပဲ။ စိတ်ပေါက်ပေါက်နဲ့ တုပ်ထည့်လိုက်မှ အချိုးပြေသွားတယ်။ အယူအဆတွေ လွဲတယ်ဆိုတာ အဲဒါပါပဲ။ တကယ်တော့ အဲဒီ အသက်ကယ် ပစ္စည်းတွေ၊ မိုးထဲလေထဲ သုံးဖို့ ပစ္စည်းတွေဟာ အမြဲကောင်းနေဖို့ဆိုတာ အမြဲ ဂရုစိုက်နိုင်မှ တော်ကာ ကျတာမျိုး။ ခက်တာက အရေးအကြောင်း မဟုတ်ဘဲ နေ့စဉ် သုံးနေတာ မဟုတ်လေတော့ တိတ်တိတ်ကလေး ပျက်နေရင်လည်း ဘယ်သူမှ မသိနိုင်ဘူး။ တကယ့် မိုးထဲလေထဲ သေရေးရှင်ရေး ထုတ်လည်းသုံးရော ပွဲတွေ ပြတ်ကုန်ရော။ စပ်မိလို့ နည်းနည်းကလေး ပြောပြပါရစေ။

တကယ်တော့ သင်္ဘောပေါ်မှာ ရှိသမျှ equipment တွေ ပစ္စည်းတွေ အားလုံး ကောင်းကောင်းမွန်မွန် အလုပ် လုပ်နေဖို့ ဂရုစိုက်ရမှာ ကပ္ပတိန်နဲ့ စက်ချုပ်ရဲ့ တာဝန်ပါ။


ဒါပေမဲ့ ကောင်းနေဖို့ မသုံးဘဲသိမ်းထားရမယ် ဆိုတဲ့ သီအိုရီကတော့ အတော်သောက်မြင်ကပ်ဖို့ကောင်းတဲ့ အတွေးအခေါ်ပါ။ အဲဒီလို ဟန်ပြလုပ်ရပ်တွေကြောင့် တစ်နိုင်ငံလုံး ပျက်ဆီးခြင်း ၅ ပါး တိုင်သွားတဲ့ နိုင်ငံကလာတဲ့ မြန်မာစူပါဗျ။ အဲဒီလို အကျင့်တွေကို တယ်ချဉ်တယ်။

နောက်တစ်ချက် ရာဘာဘုတ်တွေရဲ့ သဘောက ဖိနပ်လိုပဲဗျ။ မသုံးဘဲထားတာကြာရင် ကော်တွေကွာပြီး ပျက်စီးသွားတတ်တယ်။ အရေးအကြောင်းရှိလို့ တကယ်သုံးမယ်လည်းဆိုရော အင်ဂျင်က နှိုးမရတာနဲ့၊ ရေထဲလည်း ချလိုက်ရော ရေတွေ ဝင်လာရတာနဲ့၊ နည်းနည်းမြန်မြန်လေးလည်း မောင်းလိုက်ရော တစ်စစီဖြစ်ပြီး မျိုးပါကန်းရော။

Workboat ကို စ တင္ ႏိွဳးႀကရာဝယ္...

Maintenance plan တွေ ရှိပေမဲ့ သင်္ဘောပေါ်က system တွေကို တကယ့် plan အတိုင်း စစ်ဆေးနေတဲ့ သင်္ဘောမျိုးက နည်းတယ်ဗျ။ အများစုက on paper ပဲ လုပ်နေကြတာ။ အဲဒါကြောင့် သင်္ဘောသားတွေကို အမြဲသတိပေးရတယ်။ တစ်ခုခုဆို မလုပ်ရပြီးရော၊ သက်သာရင် ပြီးရော မတွေးပါနဲ့။ နောက်တက်တဲ့ crew တွေ လုပ်လိမ့်မပေါ့လို့ မတွေးပါနဲ့။ တကယ်တမ်း မိုးထဲလေထဲကျမှ ဒုက္ခဖြစ်ရင် ငါက အလုပ်ပြုတ်ရုံကလွဲလို့ ဘာမှ မဖြစ်နိုင်ဘူး။ ရုံးထဲမှာ ငုတ်တုတ်ကြီး မသေဘူး။ တကယ် အသက်နဲ့ ရင်းရမှာ မင်းတို့ပဲ လို့ ပြောရတယ်။


ကိုယ့်ဆရာတွေက တခါတရံ စူပါကို မပြောဘဲ ဖုံးထားဖိထားတာတွေ လုပ်တတ်တယ်။ ပြောလိုက်ရင် သူတို့ လုပ်ရမှာ စိုးလို့။ ခေါင်းစား မခံချင်ဘူးလေ။ မလုပ်ရပြီးရောလို့ တွေးတာ။ ပြီးတော့ သင်္ဘောတွေရဲ့ သဘောက crew တွေကို Short contract နဲ့ တင်တာဆိုတော့ ဒီ ၂လ ၃လ လောက်အတွင်း ဘာမှ မဖြစ်ရင် ပြီးရောဆိုတဲ့သဘော။ နောက်လူတက်လာမှ လုပ်လိမ့်မယ် ဆိုတာမျိုး။ နောက်လူကလည်း သူ့လက်ထဲ မလုပ်ရပြီးရော။ နောက်လူလာမှ လုပ်လိမ့်မယ် လုပ်ပြန်ရော။ အဲဒါနဲ့ပဲ ချာလပတ်လည်ပြီး ဖုံးမရမှ ပေါ်တဲ့အခါကျတော့ အပ်နဲ့ ထွင်းရမဲ့ကိစ္စ အမြှောက်နဲ့ ထုရတဲ့အဆင့် ရောက်ကရော။

တကယ်တမ်း ဒီသင်္ဘောအကြောင်းကို ဒီသင်္ဘောပေါ်လိုက်နေတဲ့ သင်္ဘောသားလောက် ကျနော်က ဘယ်လိုသိမလဲဗျာ။ သူတို့သင်္ဘောအကြောင်း သူတို့ အသိဆုံးပဲ။ ကားတွေလိုပဲ… သင်္ဘောတစ်စီးနဲ့ တစ်စီးလည်း မော်ဒယ်တူတာတောင် အထာ မတူတာလေးတွေ ရှိတယ်။

ဒါပေမဲ့ သူတို့အပြစ်ချည်းပဲတော့လည်း မဟုတ်ပြန်ဘူး။ စူပါတွေကလည်း တစ်ယောက်တစ်မျိုးရယ်။ ပုံမှန် လုပ်ရိုးလုပ်စဉ်သဘောတစ်ခု ပြောရရင် သင်္ဘောပေါ်က ပစ္စည်းတွေ တစ်ခုခု ဖြစ်ရင် Crew တွေလုပ်လို့ရတဲ့ကိစ္စမျိုးဆို Crew ကို လုပ်ခိုင်းရတယ်။ Crew တွေ လုပ်လို့ မရရင် အပြင် Contractor ကို ခေါ်ရတယ်။

ဤသို႔ တက္ႀကရသည္

ပြဿနာက တချို့စူပါတွေက ကိုယ့် crew ကိုယ် မယုံဘူး။ Crew က လုပ်မရလို့ အပြင်ကို ခေါ်ပေးဖို့ ပြောတာနဲ့ အကျိုးအကြောင်း သေချာ နားမထောင်ဘူး။ ဘယ်သူလုပ်တာလဲ… ဘာဖြစ်လို့ လုပ်တာလဲ.. တွေနဲ့ အသားကုန်ကောရော။ Crew က ကြိုးစားပြီး လုပ်ရင်း တစ်ခုခု အမှားအယွင်းဖြစ်လို့ ပြဿနာပိုဆိုးသွားတာမျိုးဆို မပြီးနိုင်မစီးနိုင် fxxx တော့တာ။ အဲဒီမှာတင် crew တွေကလည်း နည်းနည်းပါးပါး ဝတ္တရားကျေလေး လုပ်ကြည့်ပြီးတာနဲ့ မရဘူးလို့ ပြောရော။ လုပ်လိုက်လို့ ပိုဆိုးသွားရင် အကြီးကြီး စိတ်ညစ်ရမှာကိုး။ သူတို့နေရာမှာ ကိုယ်ဆိုရင်လည်း အဲဒီလိုပဲ တွေးမှာပဲ။ အဲဒီမှာတင် စူပါကလည်း ကြိုးစားပြီး မလုပ်ဘဲ သူ့ဆီ တင်ရပါ့မလားဆိုပြီး ဒေါသူပုန် ထပြန်ရော။ အဲဒါနဲ့ပဲ ပြဿနာရှင်းဖို့ထက် crew နဲ့ စူပါ Fxxxing သံသရာက မပြီးဆုံးနိုင်တော့ဘူး။


ကျနော်ကတော့ Crew တွေကို အမြဲပြောတယ်။ ငါက ဒီသင်္ဘောရဲ့ စူပါ။ ငါ့မှာ Vendor/Maker ကိုခေါ်ဖို့ လုပ်ပိုင်ခွင့် ရှိပြီးသား။ နောက်ဆုံး မရရင် ခေါ်မယ်။ မင်းတို့ အရင်လုပ်ကြည့်။ တစ်ခုခု ဖြစ်မှာကို မကြောက်နဲ့။ နောက်ဘိတ်ဆုံး Vendor ကို ခေါ်ရရင်တောင် မင်းတို့အတွက် အတွေ့အကြုံ ရလိုက်တာ အမြတ်ပဲ။ ပြီးတော့ ဒီသင်္ဘောနဲ့ လိုက်နေတဲ့ သင်္ဘောသားတွေဟာ ဒီသင်္ဘောရဲ့ စံနစ်တွေကို နားလည်ရင်းနှီးနေဖို့ လိုတယ်.. ဒါမှ အရေးအကြောင်းဆို မင်းတို့ကို မင်းတို့ ကယ်နိုင်မှာ… လို့ ပြောထားတယ်။

Tug boat နဲ႔ Barge ေတြ စီတန္းရပ္ထားေသာ anchorage

နောက်တစ်ချက်က ကျနော့်ကို လိမ်ပြောရင် မကြိုက်ဘူး။ အဲဒီအတွက် စကားကို လှည့်ပတ်ပြောတာ၊ အစ်တာ အောက်တာ မလုပ်ဘူး။ ကိုယ်တိုင်လည်း သူတို့ကို ရိုးရိုးသားသား ပြောတယ်။ လိမ်စရာ မလိုအောင် နားလည်မှု ပေးပါတယ်။ ကြောက်လို့ ထွက်လာတဲ့ အမှန်တရားထက် လိုလိုလားလား ပေးတဲ့ feedback အမှန်ကို ပိုယုံကြည်ပါတယ်။ အဲဒီအတွက် လက်တွေ့ ရလာဒ်လည်း တကယ် ကောင်းပါတယ်။

ပြီးတော့ သင်္ဘောက Middle East တို့ ဘာတို့ ရောက်နေရင်တော့ email နဲ့ ဖုန်းကို အားပြုပြီး ပြဿနာကို အရင်ရှင်းကြည့်တယ်။ နောက်ဆုံး မရရင်တော့ ရောက်နေတဲ့အရပ်ကို ထ လိုက်ရတာပါပဲ။

ဒါပေမဲ့ အင်ဒိုနီးရှားလောက်မှာ ရှိနေတဲ့ သင်္ဘောဆိုရင်တော့ သိပ်အများကြီး ပြောမနေဘူး။ ကိုယ်တိုင် သွားကြည့်လိုက်တယ်။ ပြီးရင် crew တွေနဲ့ တိုင်ပင်ပြီး အတူတူ ရှင်းကြတယ်။ အတူတူ ကလိကြတယ်။ ဘေးကနေ ကော်ဖီသောက်ပြီး သူတို့ကို လုပ်ခိုင်းတယ်။ စိတ်ပါရင် ကိုယ်တိုင်ဝင် နှိုက်တယ်။ မှားသွားရင်လည်း တဟားဟား တဝါးဝါး နဲ့ ဟာသလုပ်ပြီး နောက်တစ်နည်း ကြိုးစားကြတယ်။ အဲဒါကြောင့် သူတို့ ကျနော့ကိုဆို အကုန်ပြောရဲကြတယ်။ သူတို့ လုပ်မရတဲ့ကိစ္စ၊ မရှိတဲ့ ပစ္စည်းကို ထောက်ပံ့စီစဉ်ပေးဖို့က ကျနော့တာဝန်ပဲလေ။ အနည်းဆုံးတော့ သူတို့ လုပ်ဖူးသွားတယ်။ ကျနော်နဲ့လည်း ရင်းရင်းနှီးနှီး ဖြစ်သွားတယ်။

စောစောက Workboat ကိစ္စ ပြန်ပြောလိုက်ဦးမယ်။

ေနာက္ဆံုးေတာ့ ေအာင္ျမင္စြာ အသံုးျပဳႏိုင္ခဲ့၍ အလုပ္ျပီး ခရီးတြင္ခဲ့ပါသည္

အဲဒါနဲ့ တစ်ရက်တော့ ကျနော်ရယ် Client တွေရယ်ကို လူသစ် AB လေးက Workboat လေးမောင်းပြီး ပို့ပေးပါတယ်။ ဒါပေမဲ့ မကျွမ်းကျင်တော့ လှေက ဝူး ဆို ဆောင့်ထွက်သွားလိုက်၊ ရေလယ်မှာ စက်က ရပ်သွားလိုက်၊ သင်္ဘောနားကပ်တော့လည်း အရှိန်နဲ့ ဝင်သွားလိုက်နဲ့ ရေစီးကလည်း ကြမ်းတော့ နည်းနည်း ဗျာများသွားပါတယ်။ ကျနော့်အပြင် Client တွေကလည်း အမေရိကန်တွေဆိုတော့ သူ့စိတ်ထဲမှာ စိုးရိမ်တာလည်း ပါမှာပေါ့လေ။ ချွေးတွေဘာတွေတောင် ပြန်လို့။

ကျနော့ barge ကနေ သူတို့ သင်္ဘောကို Workboat လေးနဲ့ ကူးရတာကိုး။ သူ့သင်္ဘောနားလည်း ရောက်ရော စက်ချုပ် နဲ့ ဆိလောင်းကို လှမ်းအော်ပါတော့တယ်။ မင်းတို့ လာမောင်း… ငါ အဆင်မပြေဘူး.. တဲ့။ အမှန်တော့ ကျနော်တို့ ဆူမှာပြောမှာကိုလည်း ကြောက်တာပေါ့လေ။

အဲဒါနဲ့ ဝင်အော်လိုက်တယ်။ ဘယ်ကောင်မှ လာမမောင်းနဲ့။ မင်းပဲ မောင်း။ ပြဿနာ မရှိဘူး။ ရအောင်မောင်း လို့ ရယ်ကာမောကာနဲ့ ပြောလည်းပြော သင်္ဘောပေါ်က ဆင်းလာမလို့ လုပ်နေတဲ့ CE ရော ဆီလောင်း ကိုပါ အပေါ် ပြန်တက်ခိုင်းလိုက်တယ်။ CE က သင်္ဘောကျင်းက Service Boat ခေါ်ပေးရမလားတဲ့။ မလိုဘူး… သင်္ဘောကျင်းက Service Boat ကို မယုံဘူး။ ငါ့ crew ပဲ ငါယုံတယ်… ဆိုတော့… အားလုံး ရယ်ကြတယ်။

အဲဒီမှာ ချီးကျူးစရာ ကောင်းတာက အမေရိကန် Client တွေပဲ။ ကျနော် အဲဒီလို ပြောတာကို နောက်ကနေ ရယ်ရင်းမောရင်း အော်ဟစ် ထောက်ခံကြတယ်။ ဟုတ်တယ်… မင်းပဲမောင်းပါ.. တဲ့ … ဆိုပြီး AB လေးကို ပြုံးပြီး အားပေးကြ၊ လက်မ ထောင်ပြ ကြတယ်။

ဒါနဲ့ အဲဒီ AB လေးမောင်းတဲ့ Workboat နဲ့ပဲ ကျနော်တို့ ဘေးမသီ ရန်မခ ကမ်းကို ပြန်ရောက်ခဲ့ကြတယ်။ ကမ်းကိုဆင်းတော့ အမေရိကန်တွေက သူ့ကို လက်မတွေ ထောင်ပြရင်း ပြောသွားတာက “Keep trying… Practice makes perfect…” တဲ့။  နောက်နေ့ မနက်ကျတော့ ပြံုးပြံုး ပြံုးပြံုးနဲ့ Jetty မှာ လာစောင့်နေတဲ့ AB လေးကို Workboat နဲ့ အတူ တွေ့ရပါတော့တယ်။ တကယ်လေ့ကျင့်ရင် ဒါတွေက သိပ်ကြာတဲ့ ကိစ္စတွေမှ မဟုတ်ဘဲဗျာ… လုပ်ချင်စိတ် ရှိဖို့ပဲ လိုပါတယ်။

စက်ချုပ်ကြီးလည်း သူ့အလုပ်သူ ဖြောင့်ဖြောင့်တန်းတန်း လုပ်လို့ ရသွားတာပေါ့လေ။

တစ်ခုလေးပဲ ပြောဖို့ကျန်သွားတာက …..

ဒါမျိုး ဆိုတာ Life vest လေးတော့ ဝတ်ထားရတာပေါ့နော်။ ကျနော် ရေမကူးတတ်ဘူးဂျ။

(သရုပ်ဖေါ် ပုံများမှာ တကယ့်လုပ်ငန်းခွင် ကိုယ်တိုင်ရိုက်ပုံများ ဖြစ်ပြီး ကုမ္ပဏီ ပေါ်လစီနှင့် မငြိလောက်သော ပုံများကိုသာ သုံးထားခြင်း ဖြစ်ပါသည်။)