မြန်မာဖောင့်ညီညွတ်ရေး ဆရာကြီးတွေ ဖယ်ရှားပေး

နည်းနည်း မျက်စိနောက်လာလို့ မအောင့်နိုင် မအည်းနိုင် ရေးလိုက်ဦးမယ်။

မြန်မာတွေ မညီညွှတ်တဲ့ဘဝမှာ မြန်မာဖောင့်တောင် အမျိုးမျိုး။ မြန်မာစာကို ကွန်ပျူတာပေါ်မှာ စတင်နိုင်ခဲ့တာ ZawGyi နဲ့။ ZawGyi နဲ့ နေသားကျချိန်မှာ Unicode ကိစ္စဖြစ်လာတယ်။ ဖြစ်တော့လည်း ဖြစ်ပေါ့။ ဒါဟာ နည်းပညာပိုင်းအရ ဖြစ်လာတဲ့ကိစ္စပဲ။ အခုဆို HTC က စံမြန်မာ ကိုသုံးတယ်။ Microsoft က သာလွန် ကို သုံးတယ်။ Google က Myanmar 3 ကို သုံးတယ်။ အဲဒီလို မတည်မငြိမ် ဖြစ်ချင်တိုင်း ဖြစ်နေတဲ့အချိန်မှာ ကျနော်အပါအဝင် အများစုက ZawGyi နဲ့ ခရီးဆက်နေတုန်း။ သာမာန် User ဟာ Programmer လို တွေးမှာ မဟုတ်ဘူး၊ စိတ်ရှုပ်ခံမှာ မဟုတ်ဘူးဆိုတာလောက်တော့ အခြေခံကျကျ မြင်တတ်ရင် ကောင်းမှာပဲ။

မှန်တယ်။ ZawGyi က ကွန်ပျူတာမှာ ပေါ်ရုံပဲ။ ကွန်ပျူတာက နားလည်တဲ့ Unicode 5.1 ကို မလိုက်နာဘူး။ ဒါကြောင့် ကွန်ပျူတာမှာ ပေါ်ပေမဲ့ ကွန်ပျူတာစံနစ်က နားလည်တဲ့ ဘာသာစကားတစ်ခု ဖြစ်မလာဘူး။ ဒါကြောင့် နိုင်ငံတကာတန်းဝင်ဖို့ Unicode ကို သုံးဖို့ ဆော်သြကြတယ်။ ဒါကောင်းတဲ့ကိစ္စ၊ ကြိုဆိုသင့်တဲ့ ကိစ္စပဲ။

  ခက်တာက သုံးစွဲသူ (User) ဆိုတာ User လိုပဲ တွေးမှာပဲ။ သူအဆင်ပြေတဲ့ဟာကို သုံးချင်မှာပဲ။
ဒါကို ပြောင်းလဲအောင် ကြိုးစားကြတဲ့နေရာမှာ ZawGyi ကို ရစရာမရှိပြောတယ်။ ZawGyi သုံးသူတွေကို အဆင့်မရှိဘူးတို့ ဘာတို့နဲ့ Online ကနေ ဟောက်ကြဟိန်းကြသေးတာ။ အဲဒါကြောင့်ပြောတာ။ မြန်မာတွေ အများစုက အာဏာရှင်ကို တိုက်ပေမဲ့ ကိုယ်တိုင်က အာဏာရှင်ကို ကြိတ်ပြီးအားကျနေတဲ့သူတွေ များတယ်လို့ ပြောတာ။ ကိုယ်ကခံနေရလို့သာ တိုက်တာ။ ကိုယ်သာအဲဒီနေရာ ရောက်လိုက်လို့ကတော့…. တောက်… ဟင်း…. ဆိုတဲဲ့လူတွေက အတော်များတာရယ်။ မြန်မာတွေ အများစုလက်ထဲ အာဏာ ၂ ကျပ်ဖိုးလောက်ထည့်ရင် ၂၀၀ ဖိုးလောက် ပြတော့တာ။ တစ်ခုခုဆို အကျိုးနဲ့ အကြောင်းနဲ့ ပြောဆို ပညာပေးဖို့၊ ဆွေးနွေးအဖြေရှာဖို့ ဆိုတဲ့ ယဉ်ကျေးမှုမျိုး မြန်မာမှာ မရှိဘူးလို့ပြောတော့ တချို့က နာသေးတယ်။


ဒါပေမဲ့ ဒါဟာ အပြစ်အနေနဲ့ ပြောချင်တာ မဟုတ်ဘူး။ လူဆိုတာ သူက ဒီလိုလုပ်ရင် ငါကလည်း ဒီလိုလုပ်မှ ဖြစ်မယ်ဆိုတဲ့ သဘောကိုရှိတာ။ စလုံးက မြန်မာတချို့ ပြောသလိုပဲ။ စလုံးတွေက ဘယ်လိုကွန်ပလိန်းများတာ၊ အကျင့်ကဘယ်လို..။ သူတို့ကို သူတို့လိုပဲ ပြန်လုပ်မှ ဆိုပြီး တဖြည်းဖြည်းနဲ့ မကြိုက်ပါဘူးဆိုတဲ့ အကျင့်တွေ ကိုယ့်ဆီရောက်လာပြီး သူတို့နဲ့ အတူတူ ဖြစ်သွားရော။ တချို့ဆို လိုက်တုရင်းနဲ့ စလုံးအစစ်ထက်တောင် ပိုဆိုး၊ ပို ကွန်ပလိန်းများနေတာ ကိုယ်တွေ့။ ပါးစပ်ကတော့ စလုံးတွေကို မကြိုက်ဘူးပဲ။

မြန်မာဖောင့်ကို ပြန်ဆက်လိုက်ဦးမယ်။

ဘာကြောင့် ZawGyi ကို မဖြတ်နိုင်ကြသလဲ။ ဘာကြောင့် Unicode ကို လက်ခံဖို့ နှေးနေရသလဲ။ ဒါကို အမှန်အတိုင်းမြင်ပြီး ပူးပေါင်းဆောင်ရွက်ကြမှ မြန်မာဖောင့်ဟာ နိုင်ငံတကာတန်းဝင်ပြီး တွင်ကျယ်လာမှာပါ။ Programmer မျက်စိနဲ့ မကြည့်ဘဲ သုံးသူတွေ အဆင်ပြေပြေဖြစ်ဖို့၊ ပြေပြေပြစ်ပြစ် ပြောင်းလဲသုံးနိုင်ဖို့ ဆိုတဲ့ စေတနာအရင်းခံနဲ့ ဖြစ်နေတဲ့ အဆီးအတားတွေ၊ အဖုအထစ်တွေကို ကျော်နိုင်အောင် လုပ်ကြရမှာပါ။

သာမာန် User အတွေးနဲ့ တွေးရင် ရိုးရိုးလေးပါ။ သုံးနေကျ လက်ကွက်မဟုတ်တော့ဘဲ ပြောင်းသွားတဲ့ ပြဿနာ။ ဒါကလည်း လက်ကွက်အားလုံးတော့ မဟုတ်ပါဘူး။ နောက်တစ်ခုက ZawGyi က လှတယ်။ အဲဒီဖောင့်ပုံစံနဲ့ Unicode လုပ်ရင်ရော။ နောက်တစ်ခု အဆိုးဆုံးက စာဖတ်သူအများစုက Unicode နဲ့ မဖတ်ကြသေးဘူး။ ဒါကလည်း Unicode နဲ့ရော ZawGyi နဲ့ရော တွဲပြီး ဖေါ်ပြတဲ့ နည်းနဲ့ အရင်သုံး၊ နောက်မှ ZawGyi ကို ဖြုတ်။ ဒီလိုဆို အဆင်ပြေနိုင်ကောင်းရဲ့။ ပြီးတော့ ကျနော်တို့လို Blog ရေးတဲ့သူတွေရဲ့ ဒုက္ခ။ ကိုယ့် Blog လေးကို နှစ်နဲ့ချီပြီး ရေးခဲ့ရတာ။ အခု အဲဒါတွေအားလုံးကို Unicode ပြန်ပြောင်းဖို့ဆိုတာ။ ဘာပဲဖြစ်ဖြစ် အချိန်ယူရမယ်။ ပြောပြရမယ်။ စည်းရုံးရမယ်။

အခုတော့ မြင်လိုက်သမျှ Unicode သမားတွေက တကယ့်ဆရာကြီးလေနဲ့ လူတွေအားလုံးက ZawGyi သုံးတဲ့အတွက် အဆင့်အတန်းတွေပဲ မရှိကြတော့သလိုလို၊ ZawGyi ဟာ ဘယ်လိုမှ အဆင့်မရှိ သုံးမရတဲ့ဖောင့် ဖြစ်တော့သလိုလို၊ အထက်ဆီးလေတွေနဲ့ ဟောက်ဟိန်းခြိမ်းခြောက်နေကြပုံမျိုးနဲ့တော့ မြန်မာဖောင့်ညီညွတ်ရေးဟာ လိုအပ်တာထက် ပိုကြာနေဦးမှာပါပဲ။

အခုလေးတင် ဖတ်ရတဲ့ အင်တာဗျူးလေး ၂ ခုကို ထပ်ဖြည့်လိုက်တယ်။

 

 

တကယ်တော့ အဖြေက ရှိပြီးသားပါ။ ပြဿ     နာရဲ့ တကယ့်ရင်းမြစ်က User တွေကို အလေးမထားဘဲ အတ္တကို ရှေကတန်းတင်ပြီး ငါတကောကောခဲ့တဲ့ Unicode သမားတွေရဲ့ လက်ချက်လို့ပဲ သုံးသပ်ရတော့မှာပါပဲ။ တကယ်တမ်းသာ User တွေကို အလေးထားပြီး ဇော်ဂျီနဲ့ အဆင်ပြေအောင်၊ အကူးအပြောင်း ချောမွေ့အောင် ရည်ရွယ်လုပ်ဆောင်ခဲ့ရင် ဒီနေ့ ပြဿ     နာတွေလည်း ပေါ်လာမှာ မဟုတ်သလို ကျနော်တို့ အားလုံးလည်း Unicode နဲ့ စတိုင်ကျနေလောက်ပါပြီ။

ပြောရမယ်ဆိုရင် ဖောင့်မှာတောင် ZawGyi ဟာ သုံးစွဲသူတွေအပေါ် နွေးထွေးစေပြီး Unicode ကတော့ အာဏာရှင်ဆန်တဲ့အတွက် ခုထိ အဆင်မပြေတာလို့ ပြောရင် ရမလားပဲ။ အပေါ်က အင်တာဗျူးကို ဖတ်ကြည့်ပါ။ Unicode ကို တစ်နိုင်ငံလုံးသုံးဖို့ အမိန့်အာဏာနဲ့ ပြဋ္ဌာန်းဖို့ ကြံနေတဲ့သဘောကို တွေ့ရမှာပါ။ User ကို အဆင်ပြေအောင် လုပ်ပေးဖို့ထက် အမိန့်ပေးချင်တဲ့စိတ်ဓါတ်ကို စိတ်ပျက်တာပါ။ နေရာတကာမှာ အမိန့်ကိုပဲ အားကိုးပြီး အလုပ်လုပ်တာဟာ အာဏာရှင်ပါပဲ။ ကျနော်ကတော့ အာဏာရှင်ဆိုတာကို အရိုးထဲအသွေးထဲကကို မကြားချင် မမြင်ချင်တဲ့သူမို့ ယူနီကုတ်ကို တခါတခါ ပြောင်းသုံးကြည့်ပြီးရင်တောင် ဖီးလ်မလာတာနဲ့ ဇော်ဂျီပဲ ပြန်လှည့်မိတာပါပဲ။

ZawGyi ထက် Unicode က ပိုပြီးကောင်းမွန်ကြောင်း စကားလုံးအကြီးကြီးတွေနဲ့ သမားဂုဏ်ပြ ပြောဆိုနေမဲ့အစား သာမာန် User လို ဝင်တွေးပြီး ရိုးရိုးရှင်းရှင်း ပြောပြ ရှင်းပြ လုပ်သလို Windows နဲ့ Mobile တွေအားလုံးအတွက် Standard Font တစ်ခု ဖြစ်လာအောင် ကြိုးစားကြရင် Apple လည်း လိုက်လာမယ်၊ လူတွေလည်း ပိုပြီး လွယ်ကူအသုံးကျတဲ့နောက်ကို အတင်းဆဲဆိုကြိမ်းမောင်းစရာမလို အော်တိုလိုက်လာကြမှာ သေချာပါကြောင်း။

(သရုပ်ဖေါ်ပုံများကို Google မှ ယူသည်။)