စရိုက်၊ သမိုင်း၊ ခံစားမှု နှင့် The Lady

နေပြည်တော်အဆင့်မြင့်ရုပ်ရှင်ရုံတွင် အသံပိုင်းအင်ဂျင်နီယာအဖြစ် တာဝန်ထမ်းခဲ့စဉ်က အချို့ရုပ်ရှင်များကို တစ်ရက် ၅ ပွဲထိုင်ကြည့်နေတတ်သော ကျွန်တော်သည် ရုပ်ရှင်ကြည့်ရတာတော့ အတော်ကြိုက်ပါသည်။ ဝါသနာပါသည်ဟု ဆိုနိုင်ပါသည်။ အလုပ်ပျက် အကိုင်ပျက် ကြည့်တတ်သည်မဟုတ်၍ အရူးအမူးဟုတော့ ဆိုနိုင်မည်မထင်။ ရုပ်ရှင်လောက တချို့ပုဂ္ဂိုလ်များဆီမှ ရုပ်ရှင်ဗဟုသုတ ကြားဘူးနားဝ နည်းနည်းပါးပါးလည်း ရှိသည်ပေါ့။ Tarzan ကာတွန်းကား ရုံမတင်မီ အစမ်းကြည့်ကြစဉ်က ကလေးနှင့် ကျားသစ်ကို foreground, background ဆွဲ၍ အနီးအဝေးပြသည့်အခါ အံ့အားသင့်ရကောင်းမှန်း သိခဲ့သည်။ ရုပ်ရှင်ရိုက်သည့်အခါ ဇာတ်ကောင်တစ်ကောင်ကို မှုန်ဝါးသွားပြီး အခြားဇာတ်ကောင်ကို အထင်ပြခြင်း၊ တဖြည်းဖြည်း ဇာတ်ကောင်ကို မှုန်ဝါးသွားပြီး ရှုခင်းကို အထင်ပြခြင်းမျိုးများကို ကင်မရာမှန်ဘီလူးကို ကစားခြင်းဖြင့် လုပ်ယူ၍ရပါသည်။ သို့သော် ကာတွန်းရုပ်ရှင်ကို အဘယ်သို့လျှင် မှန်ဘီလူးကစား၍ ရနိုင်အံ့နည်း။ ဤကဲ့သို့ ဆွဲပြခြင်းမှာ ထိုစဉ်က အံ့အားသင့်ဖွယ်ရာ တစ်ခုပါ။ ကျွန်တော့်တွင် Hard Disk နှင့် သိမ်းဆည်းထားသော ရုပ်ရှင် ၁၀၀၀ ခန့် ရှိပါသည်။ အကုန်လုံး ကြည့်နိုင်သည်တော့ မဟုတ်ပါ။ သို့သော် အချိန်ရလျှင်တော့ ရုပ်ရှင်ဖြင့်မူးယစ်ခြင်းသည် ခဏတာအားဖြင့် ဘဝအပူများကို မေ့လျော့ပေါ့ပါးစေသည်ကတော့ အမှန်ပါ။

ရုပ်ရှင်ကို ဝါသနာပါသော ကျွန်တော်သည် နိုင်ငံရေးကိုတော့ နားမလည်ပါ။ နိုင်ငံရေးသည် နိုင်ငံသားတိုင်း၏ အရေးဆိုတာကိုတော့ အပြည့်အဝလက်ခံပါသည်။ သို့သော် နိုင်ငံရေးပရိယာယ်တွေ၊ ကွေ့ကွေ့ကောက်ကောက်တွေကိုတော့ မည်သို့မျှ နားမလည်ရှာသော နိုင်ငံရေးငတုံးတစ်ကောင်သာ ဖြစ်ပါသည်။ သတင်းပလင်း နည်းနည်းပါးပါးဖတ်ပြီး တူရာတူရာသူငယ်ချင်းတွေနှင့် ဟိုပြောဒီပြောနည်းနည်းပြောပါသည်။ များများပြောလျှင် ကျွန်တော်တုံးတာတွေ လူသိကုန်မည်စိုး၍ ဖြစ်ပါသည်။ အငြင်းအခုန်လုပ်ခြင်းကို လုံးလုံးလျားလျား စိတ်မဝင်စားသောကြောင့် ငြင်းစရာခုန်စရာ အလွန်ကောင်းသော နိုင်ငံရေးကို အမြင်မတူသူများနှင့် ဘယ်သောအခါမျှ မပြောပါ။ မငြင်းမခုန်သဖြင့် မတိုးတက်နိုင်ဟု ပြောလျှင်လည်း ရှိပါစေတော့။ အသက် ၃၅ နှစ်ကျော်ကတည်းက အတိုက်အခံ အငြင်းအခုန်တွေလုပ်ရတာကို စိတ်ပင်ပန်းတတ်လာခဲ့တာ အမှန်ပါ။ ယခု ဤဆောင်းပါးသည်လည်း ကျွန်တော့်အမြင်၊ ကျွန်တော့်အတွေးကို မှတ်သားခြင်းသာဖြစ်၍ ငြင်းခုန်ရန်မရည်ရွယ်ပါကြောင်း။

ပြီးခဲ့သည့်အပါတ်ကတော့ The Lady သွားကြည့်ပါသည်။ The Lady ရုံမတင်ခင်ကတည်းက ကျွန်တော်စိတ်ဝင်စားနေတာ အချက်တစ်ခုရှိပါသည်။ ဤသည်ကား ဒေါ်အောင်ဆန်းစုကြည်၏ ပုံရိပ် (Figure) သည် ကြီးကျယ်လွန်းလှသည်ဖြစ်လေရာ ပြသချိန် ၂ နာရီဝန်းကျင်ဖြင့် သူ့ဘဝကို မည်ကဲ့သို့ ဖေါ်ပြမည်နည်း ဆိုသည့်အချက်ဖြစ်ပါသည်။ အဖေနှင့်သမီး၊ သားအဖနှစ်ယောက်စလုံး ပြည်သူလူထု၏ အားကိုးရာ၊ ကျွန်တော်တို့နိုင်ငံမှ ကမ္ဘာသိ ဒီမိုကရေစီ icon အမျိုးသမီးတစ်ဦး၊ နိုဗယ်ငြိမ်းချမ်းရေးဆုအပါအဝင် နိုင်ငံတကာမှ ပေးအပ်သောဆုများစွာ၏ ပိုင်ရှင်၊ ကျွန်တော်တို့ နိုင်ငံလွတ်လပ်ရေး ဗိသုကာ၏ သမီး၊ ကျွန်တော်တို့၏ ခေါင်းဆောင်….. ဝိသေသများက များလွန်းလှသည်။ ဒေါ်စုအကြောင်းပြောလျှင် မပါမဖြစ်သူရဲကောင်းတွေက ကျွန်တော်တို့နိုင်ငံ၏ နိုင်ငံရေး ဖြစ်စဉ်တွင် မနည်းလှ။ ဒေါ်အောင်ဆန်းစုကြည်၏ များလှစွာသော အရည်အချင်းများကို နှိုင်းယှဉ်၍မရနိုင်သော်လည်း အများအတွက် စွန့်လွှတ်ပေးဆပ်ခြင်းတွင်မူ ဒေါ်အောင်ဆန်းစုကြည်နည်းတူ မလျော့သော ပေးဆပ်ခြင်းများဖြင့် အာဇာနည်များ၊ သူရဲကောင်းများ ကျွန်တော်တို့ နိုင်ငံတွင် များလှသည်။ အခြားသောနိုင်ငံများတွင် သူရဲကောင်းတစ်ယောက် ပေါ်ထွန်းရန် ရှားရှားပါးပါး ဖြစ်သော်လည်း ကျွန်တော်တို့တွင် ယုံကြည်မှုအတွက် အသက်စွန့်သွားသူ၊ အသက်စွန့်ထားသူတွေ အများကြီးဖြစ်သည်။ အမည်ထင်ရှားခြင်း၊ မထင်ရှားခြင်းသာ ကွာပါလိမ့်မည်။ လူအများသတိမပြုမိသော အညတရ သူရဲကောင်းတွေ၊ အာဇာနည်တွေ ဒု နှင့် ဒေး ဖြစ်သည်မှာ ငြင်းမရသော မြန်မာ့သမိုင်းတစ်ခုပါ။

The Lady ရိုက်ကွင်းမှ ဒါရိုက်တာနှင့် သရုပ်ဆောင်များ

သို့ဖြစ်ရာ ဒါရိုက်တာ Luc Besson သည် The Lady ကို မည်ကဲ့သို့ သရုပ်ဖေါ်မည်နည်း။ ကျွန်တော် အလွန်စိတ်ဝင်စားပါသည်။ The Lady သည် အချက်အလက် (Documentary) ရုပ်ရှင် မဖြစ်နိုင်မှန်းကိုတော့ အစကတည်းက မှန်းဆမိခဲ့ပါသည်။ ဒေါ်စုဘဝ၏ မည်သည့်အပိုင်းကို Focus လုပ်မည်နည်း ဆိုတာကိုသာ စိတ်ဝင်စားခြင်း ဖြစ်သည်။ နောက်ပိုင်း The Lady ကြော်ငြာသောအခါ Luc Besson ကိုယ်တိုင်ကလည်း ဒေါ်စု၏ သာမာန်အိမ်ရှင်မတစ်ယောက်ဘဝကို ခြယ်မှုန်းပြမည်ဟုသာ ဆိုခဲ့သည်ပဲ။

စ စ ခြင်း ဗိုလ်ချုပ်အောင်ဆန်းက သမီးလေး စု ကို ကျွန်တော်တို့နိုင်ငံ သမိုင်းပုံပြင်အား ပြောပြခြင်းဖြင့် ဇာတ်လမ်းကို ဖွင့်ပါသည်။ နောက်တော့ ဗိုလ်ချုပ်လုပ်ကြံခံရသည့် အခန်းကိုပြသည်။ နောက်တော့ ဒေါ်စုနှင့် မိုက်ကယ်အဲရစ်တို့ Oxford မှ မိသားစုဘဝလေး….၊ ဒေါ်ခင်ကြည် နေမကောင်း၍ ဒေါ်စု မြန်မာပြည် ပြန်လာသည်။ ၈ လေးလုံး အရေးတော်ပုံနှင့် တိုးသည်။ ဒေါ်ခင်ကြည် ဆုံးသည်။ ဒေါ်စု မြန်မာ့နိုင်ငံရေး လောကထဲ ရောက်လာသည်။ Oxfordshire တွင်  မိုက်ကယ်အဲရစ်၏ အိမ်ရှင်မ မပါဘဲ သားနှစ်ယောက်နှင့် ဘဝကို ဖြတ်သန်းရပုံများ….၊ ဒေါ်စု နယ်လှည့်စည်းရုံးရေး ဆင်းသည်။ အကျယ်ချုပ် အကြိမ်ကြိမ်ချခံရသည်။ မိုက်ကယ်အဲရစ် ကင်ဆာရောဂါဖြင့် မကွယ်လွန်မီ ဒေါ်အောင်ဆန်းစုကြည်နှင့် တွေ့ခွင့်ရရန် ကြိုးစားသော်လည်း မြန်မာအစိုးရမှ ပြည်ဝင်ခွင့်ပိတ်ပင်ခဲ့သည်။ ၁၉၉၉ တွင် မိုက်ကယ်အဲရစ် ကွယ်လွန်သွားပါသည်။ နောက်ဆုံး စက်တင်ဘာအရေးအခင်းတွင် သံဃာတော်များကို နေအိမ်အကျယ်ချုပ်မှ ဒေါ်အောင်ဆန်းစုကြည် ထွက်၍ဖူးမျှော်ခန်းဖြင့် ဇာတ်လမ်းကို အဆုံးသတ်ထားသည်။ ဤသည်က The Lady ဇာတ်လမ်း အကျဉ်းချုပ်ဖြစ်သည်။

ဝေဖန်သူများက ဗိုလ်ချုပ်လုပ်ကြံခံရသော အခန်းတွင် ဗိုလ်ချုပ်ကို ပစ္စတိုဖြင့် တေ့ပစ်သည်။ ၁၉၄၇ တွင် ပစ္စတိုမပေါ်သေး။ တကယ့်တကယ် လုပ်ကြံပုံကလည်း ထိုသို့မဟုတ်။ ဖြစ်ကတတ်ဆန်း ရိုက်ထားသည်။ သမိုင်းမှန်နှင့် ကင်းကွာသည်ဟု ဆိုကာ မကျေနပ်ကြ။ ဗိုလ်ချုပ်လုပ်ကြံခံရသော အခန်းအပြင် အချို့အခန်းများသည်လည်း သမိုင်းမှန်နှင့် ကင်းကွာသည်။ မကောင်းဘူး၊ သွားကြည့်မနေနဲ့ဟု ဆိုသည်။ အချို့က ရိုက်စားကြီးပါဟု ပြောသည်။ အချို့ကတော့ အင်တာနက်တွင် အလကားကြည့်၍ရမှ ကြည့်တော့မည်ဟု ဆိုသည်။ အမျိုးမျိုးသော ဝေဖန်လေကန်ခြင်းများကို နားထောင်ပြီးသည်၏ သကာလ၌ ကျွန်တော်တို့ လင်မယားသွားကြည့်ဖို့ ဆုံးဖြတ်သည်။ မကောင်းဘူးဆို ဘယ်လိုမကောင်းသနည်း…၊ ဘာနည်းပညာမှ မပါသော၊ ဘာဇာတ်လမ်းဇာတ်ကွက်မျှ မရှိသော၊ ဘာအနှစ်သာရမျှမရှိသော၊ ဘာမျှမကျန်သော ရုပ်ရှင် ဗွီဒီယိုများကိုပင် အားပေးနေရသေးရာ၊ ယခုကဲ့သို့ ကိုယ့်နိုင်ငံနှင့် ပါတ်သက်သော၊ ကိုယ့်ခေါင်းဆောင်နှင့် ပါတ်သက်သော၊ နိုင်ငံတကာတန်းဝင် ရုပ်ရှင်အား အဘယ်ကြောင့် လျစ်လျူရှုနိုင်အံ့နည်း။ ကြည့်ရမည်။ မကောင်းလျှင် ဘာကြောင့်မကောင်းဟု သိချင်သည်။ ဟောလိဝုဒ် ရုပ်ရှင်များတွင် လုံးလုံးလျားလျား မကောင်းတာ ရှိသော်လည်း နည်းပါသည်။ အနည်းဆုံးတော့ သရုပ်ဆောင် ပီပြင်ကြပါသည်။ ထို့ကြောင့် ဘယ်သူဘာပြောပြော ကြည့်ဖြစ်အောင် ကြည့်ပါသည်။

စင်ကာပူ ရုပ်ရှင်ရုံများအနက် GV (Golden Village) ကုမ္ပဏီတစ်ခုတည်းမှ ကန်ထရိုက်ဆွဲထားပုံ ရပြီး The Lady ကို GV ရုံများတွင်သာ တင်ထားသည်ကို တွေ့ရသည်။ GV ရုပ်ရှင်ရုံ ၁၂ ရုံတွင် တစ်ပြိုင်တည်း ပြသည်။ အချို့ရုံများတွင် တစ်ရက် ၂ ပွဲမှ ၆ ပွဲပြသသည်ကို တွေ့ရသည်။ ကျွန်တော် ကြာသာပတေးနေ့တွင် လက်မှတ် Booking လုပ်ရာ ကြာသာပတေးနေ့အတွက် မရဘဲ သောကြာနေ့အတွက်သာ ရပါသည်။ စနေ၊ တနင်္ဂနွေ မဟုတ်ပါဘဲ ကြားရက်ကြီးတွင် ပွဲစဉ်အများစု ပြည့်နေသဖြင့် ကျွန်တော် အံ့သြမိသည်။ စင်ကာပူတွင် ရုပ်ရှင်ရုံတွေက များလှသည်ဖြစ်ရာ ကြားရက်ကြီး ရုပ်ရှင်လက်မှတ်မရသည် ဆိုခြင်းမျိုးက ရှားပါသည်။ ထို့ပြင် The Lady ကို NC 16 သတ်မှတ်ထားသည်။ နိုင်ငံရေးနှင့် ပါတ်သက်သဖြင့် ၁၆ နှစ်အောက် ကြည့်ရန်မသင့်ဟု သတ်မှတ်ထားပုံ ပေါ်ပါသည်။

တကယ်လည်း The Lady တွင် ဒါရိုက်တာသည် ဒေါ်စု၏ နိုင်ငံရေးဘဝထက် အိမ်ရှင်မဘဝကိုသာ အဓိကဦးတည်ခြယ်မှုန်းထားခဲ့ပြီး သမိုင်းဖြစ်ရပ်မှန်ကို ပါလေကာမျှထည့်သွင်းထားသည်ဟု ဆိုနိုင်သည်။

ကောင်းတာလေးတွေ အရင်ပြောရမည်ဆိုလျှင် ဒါရိုက်တာသည် ဒေါ်အောင်ဆန်းစုကြည်၏ ကျော်ကြားသော ဝိသေသဂုဏ်ပုဒ်များ နောက်ကွယ်မှ ရိုးစင်းသော ဘဝကို ပြသသွားသည်။ တော်ရုံလူ မရနိုင်သော အောင်မြင်မှုများ နှင့် မိသားစုကို ပစ်၍ တိုင်းပြည်မျက်နှာကိုသာ ကြည့်ခဲ့သော နိုဗယ်ဆုရှင်၏ ဘဝကို သာမာန်နှင့်မတူသော၊ မြင်နေကျမဟုတ်သော ရှုထောင့်တစ်ခုမှ ခြယ်မှုန်းသွားခဲ့သည်။

တကယ်တမ်းတွင် ဒေါ်စု၏ နောက်ကွယ်မှ အားပေးထောက်ပံ့ခဲ့သော ခင်ပွန်းသည် မိုက်ကယ်အဲရစ်၏ ဘဝက တစ်ကားလုံးကို ဖမ်းစားထားခဲ့ပါသည်။ မိုက်ကယ်အဲရစ်အဖြစ် သရုပ်ဆောင်သော David Thewlis ကို အခြားဇာတ်လမ်းများတွင် ကျွန်တော်မကြည့်ဖူးဘူးဟု ထင်သည်။ မမှတ်မိတာလည်း ဖြစ်နိုင်ပါသည်။ သို့သော် The Lady တစ်ကားတည်းနှင့်ပင် သူ့သရုပ်ဆောင်ချက်များကို ကျွန်တော်တော်တော်ကြိုက်နှစ်သက်သွားကြောင်း ဝန်ခံပါရစေ။

အကြိုက်ဆုံးအခန်းမှာ ဒေါ်စု၏ခြံဝင်းအတွင်း အစောင့်ချထားသော စစ်သားက ခြံဝင်းအတွင်း ထိုင်လျက်ဆေးလိပ်သောက်ရင်း စာဖတ်နေသော မိုက်ကယ်အဲရစ်နှင့် မျက်လုံးချင်းအဆုံ၊ ဒေါ်စု၏ စန္ဒယားသံက ထွက်အလာ၊ စစ်သားများက ဘာသံလဲဟု မေးသောအခါ မိုက်ကယ်အဲရစ်၏ ပြန်ဖြေပုံကား မျက်လုံးထဲ စွဲကျန်ရစ်စေပါသည်။ ဒေါသဖြစ်သော မျက်လုံးမဟုတ်၊ နှိမ့်ချသော မျက်လုံးမဟုတ်၊ တေးဂီတကို မခံစားတတ်သော စစ်သည်ကို ဂရုဏာအကြည့်ဖြင့် ဖြေလိုက်သော လေသံနှင့် သရုပ်ဆောင်ချက်မှာ အလွန်ပီပြင်လှသည်။ လူသားအလွန်ဆန်သော အမြင်တစ်ခုကို ညွန်းဆိုသွားသည်။
(ကျွန်တော် ခံစားရသလို ပြောခြင်းဖြစ်ပါသည်။ အချို့သူငယ်ချင်းများက ကျွန်တော်တို့ လူမျိုးကို နှိမ့်ချသည်ဟု ခံစားပါသည်။ နှစ်သက်သလို ယူတော်မူကြပါ။)

ဒေါ်စု၏ နိုင်ငံရေးဘဝကို ကျွန်တော်တို့ မြင်နိုင်ကြသည်။ မှားသည် မှန်သည် ဝေဖန်သူတွေ များလှသည်။ နိုင်ငံရေးသမားဆိုသည်က အားလုံးရဲ့မျက်စိအောက်မှာ နေရသူကိုး။ မှားလျှင်လည်း လူသိသည်။ မှန်လျှင်လည်း လူသိသည်။ အတိုက်အခံကလည်း ပုံစံအမျိုးမျိုး အမြင်အမျိုးမျိုးဖြစ်သည်။ သင်္ဘောကျင်း အင်ဂျင်နီယာမျှသာ ဖြစ်သော ကျွန်တော်သည်ပင် တစ်ခါတစ်ရံ အလုပ်ဖိအားတွေ များလာသည့်အခါ မခံမရပ်နိုင်ဘဲ ပေါက်ကွဲသည့်အခါတွေရှိသည်။ မှားတာမှန်တာ ဂရုမစိုက်တော့ဘဲ ဇွတ်တရွတ်လုပ်တာတွေရှိသည်။ ညစ်တွန်း တွန်းသည့်အခါ တွန်းသည်။ နိုင်ငံရေးသမား (ပြည်သူအတွက် တကယ်လုပ်သည့် စစ်စစ်များကို ဆိုလိုပါသည်) များသည်လည်း ပုထုဇဉ်ပေပဲ။ လုပ်မှားကိုင်မှား ရှိသည့်အခါ ရှိပေမပေါ့။ သံဃာတော်များပင်လျှင် အရိယာသံဃာနှင့် ပုထုဇဉ်သံဃာ တူနိုင်သည်မှ မဟုတ်ပေပဲ။

သူ့ရဲ့ မိသားစုဘဝစွန့်လွှတ်မှုတွေကိုတော့ ကျွန်တော်တို့ ကြားဖူးကြသလို သူ့မိသားစုဘက်က ပေးဆပ်မှုတွေလည်း ရှိပေမှာပဲဟု တွေးမိပါသည်။ ဆရာအော်ပီကျယ် နှင့် ရစ်ချတ်ဖိုင်းမန်း တို့လို ထင်ရှားသူတို့ရဲ့ ဘဝအဖေါ်တွေ ပေးဆပ်ဖေးမထောက်ပံ့မှုတွေကို သတိထားမိခဲ့သော ကျွန်တော်သည် မိုက်ကယ်အဲရစ်၏ ကူညီမှုများကို ကြားဖူးသော်လည်း သေသေချာချာ သတိမထားမိခဲ့။ မိုက်ကယ်အဲရစ်ကြီး မြန်မာပြည်ကိုလာတော့ မင်းကွန်းဆရာတော်ဘုရားကြီး၊ ရွှေတောင်ကုန်းဆရာတော် နှင့် ချမ်းမြေ့ရိပ်သာဆရာတော်…. စသည့် ဆရာတော်ကြီးများကို သွားရောက်ဖူးမျှော်ခဲ့သည်။ မင်းကွန်းဆရာတော်ကြီးနှင့်တွေ့တော့ ဆရာတော်ကြီးရော မိုက်ကယ်အဲရစ်ရော ပါဠိလိုတွေချည်း ပြောကြသဖြင့် ထောက်လှမ်းရေးတွေ ငုတ်တုတ်မေ့ခဲ့ရကြောင်း ကြားဖူးကတည်းက လေးစားမိပါသည်။

ဆရာအော်ပီကျယ် ပြောသကဲ့သို့ပင်။ မြန်မာပြည်မှာနေသည့် မြန်မာနိုင်ငံသား၊ သို့သော် မြန်မာပြည်ကို ဒုက္ခပေးနေသူတွေ အများကြီးရှိသလို နိုင်ငံခြားသား ဖြစ်သော်လည်း မြန်မာပြည်ကို ချစ်သည့် တန်ဖိုးထားသည့် ပုဂ္ဂိုလ်တွေ အများကြီး ရှိသည်..တဲ့။ မစ္စတာ ဂီး (Mr Gee)  ဆိုသည့် မြန်မာကိုချစ်သော ကမ္ဘာကျော်ကာတွန်းဆရာကြီး ကို ဥပမာပေး၍ ပြောပြသွားခဲ့သည်။ မျိုးချစ်စိတ်ဓါတ်ဆိုသည်မှာ ကျဉ်းမြောင်းသော လူမျိုးကြီးဝါဒ၊ လူမျိုးရေးစိတ်ဓါတ်မျိုးကို ဆိုလိုခြင်းမဟုတ်ကြောင်းတော့ တော်တော်ဒူသော၊ တော်တော်ပိန်းသော ကျွန်တော်ပင် ရေးတေးတေး နားလည်သွားခဲ့ပါသည်။ ပြီးတော့ ဘယ်နိုင်ငံသားခေါင်းစဉ်တပ်တပ်၊ ကျွန်တော်တို့အားလုံး ကမ္ဘာကြီးရဲ့ ကမ္ဘာ့ပြည်သူတွေပါပဲ ဆိုသည့် ဆရာ့စကားလေးကိုလည်း ကျွန်တော်ကြားယောင်မိသည်။ ရွာကြီးဖြစ်လာသော ကမ္ဘာကြီးတွင် ကျွန်တော်တို့ ရှေးရိုးစွဲအတွေးအခေါ် တချို့ကို ပြန်လည်စမ်းစစ်ဖို့ လိုလာသည်ဟု ခံစားရပါသည်။ မှန်သည် မှားသည်ကတော့ ခံယူသူရဲ့ သဘောထားပေါ် မူတည်ပါလိမ့်မည်။

ကျွန်တော်အလုပ်တွင် ကျွန်တော်ပေကပ်ကပ် လုပ်သည့်အခါ အကျိုးဆက်ကို ကျွန်တော့်ဦးဆောင်မှုအောက်မှ ဝန်ထမ်းငယ်တွေ ခံစားကြရသည်။ နိုင်ငံခေါင်းဆောင်ဆိုသည်ကား တစ်ခုခုလုပ်တိုင်း အကျိုးဆက်က ကြီးလှသည်။ သို့သော် သူတို့လည်း လူသားတွေပဲမို့ စေတနာမှန်သော်လည်း လုပ်ရပ်မှားသည့် အချို့ကိစ္စများကို ကျွန်တော်ကတော့ ခွှင့်လွှတ်နိုင်ပါသည်။ အမြဲတမ်းမှားနေတာမျိုးတော့ တစ်မျိုးပေါ့လေ။ ပညာမဲ့တစ်ယောက် တိုင်းပြည်ကို အရမ်းချစ်လျှင် အလွန်အန္တရာယ်များသည်ဟု ဆရာဦးအောင်သင်းက သတိပေးဖူးပါသည်။ ဆိုလိုသည်မှာ တိုင်းပြည်ကို ချစ်ခြင်း၊ လူမျိုးကို ချစ်ခြင်း ရှိတိုင်း မှန်မှန်ကန်ကန် ဦးဆောင်နိုင်သည်မဟုတ်။ စဉ်းစားဆင်ခြင်ဉာဏ်နည်းသော ခေါင်းဆောင်၏နောက်တွင် လိုက်ပါရသောတိုင်းပြည် တစ်ပြည်၏ ကံကြမ္မာသည် မည်မျှဆိုးရွားမည်ကို ကျွန်တော်တို့ မြန်မာတွေလောက် သိမည့်လူမျိုး ကမ္ဘာပေါ်တွင် များများရှိမည်မထင်။ သို့သော် နိုင်ငံရေးကို နိုင်ငံ့အရေးဆိုတာလောက်သာ ကြားဖူးသော ကျွန်တော့်လို ငတုံးအတွက်တော့ ဘယ်သူ့ကိုမှ မဝေဖန်ဝံ့ပါ။ သူတို့လိုလည်း သတ္တိမရှိပါ။ သူတို့လိုလည်း မစွန့်ဝံ့ပါ။ ကျွန်တော်လိုကောင်မျိုး နိုင်ငံရေးလုပ်လျှင်လည်း အားလုံးဒုက္ခရောက်ဖို့သာရှိပေမည်။ တစ်ချက်လောက် ရိုက်စစ်တာနှင့် အကုန်ဖေါ်မည့် သတ္တိမျိုးနှင့် အဘယ်မှာလျှင် နိုင်ငံရေးနှင့် နီးစပ်မည်နည်း။ အများအတွက် အနစ်နာခံလုပ်နေသူများကို လေးစားမိပါသည်။ ကြည်ညိုမိပါသည်။

ဘာမှလည်းမလုပ်ဘဲ ဘေးထိုင်ဘုပြောများတော့ သိပ်ကြည့်မရပါ။ တကယ်နားလည်၍ တကယ်လုပ်နေသူများက ဝေဖန်တာတော့ ကျွန်တော်နားထောင်ပါသည်။ သူတို့က တကယ်စွန့်လွှတ်မှု ရှိသူတွေ။ သူတို့က ဘာကြောင့်ဘယ်လို ဆိုတာမျိုးတွေ အကျိုးသင့် အကြောင်းသင့် သုံးသပ်ပြတော့ ဟုတ်သားဟ… ငါဖြင့် သူတို့လို တစ်ခါမှ မတွေးဘူးပေါင်… နည်းနည်းပါးပါးတော့ တွေးတတ်ဖို့ကောင်းတယ်.. ငါ တယ်ညံ့တာပဲ.... ဟု တည့်တည့်ပြောမှ ရိပ်မိတတ်သည့် ကိုယ့်ကိုယ်ကို အားမလိုအားမရ ဖြစ်မိတာတော့ အမှန်..။

ဤဆောင်းပါးသည် The Lady ကြည့်ပြီး တွေးမိသော အတွေးစ အချို့သာဖြစ်ပါသည်။ The Lady နှင့် ပါတ်သက်၍ ပြောရမည်ဆိုလျှင် ဆရာချစ်ဦးညို၏ ဝတ္ထုဖတ်ရသကဲ့သို့ ရှိပါသည်။ အများအားဖြင့် ဆရာချစ်ဦးညိုရဲ့ ဝတ္ထုများသည် သမိုင်းကို အခြေခံသော်လည်း သမိုင်းမဟုတ်ပါ။ The Lady သည်လည်း ထိုနည်းလည်းကောင်းပင် ဖြစ်ပါသည်။ ဖြစ်ရပ်မှန်များကို အခြေခံသော်လည်း ဖြစ်ရပ်မှန်အတိုင်း ရိုက်ပြသောရုပ်ရှင် မဟုတ်ပါ။ Documentary ရုပ်ရှင် မဟုတ်ပါ။ နိုင်ငံရေးဇာတ်ခုံ၏ နောက်ကွယ်မှ လူအများသတိမပြုမိသော မိသားစုဘဝ၊ စိတ်ခံစားမှု၊ နားလည်မှု၊ ဖေးမမှုများ၊ စနစ်ဆိုးတစ်ခု၏ နောက်ကွယ်မှ ရက်စက်မှုများ၊ တစ်ယူသန်မှုများ၊ စွဲလန်းမှုများ၊ ခံစားမှုများ၊ ပေးဆပ်မှုများကို သဘောသဘာဝအရ (characteristics) ပေါ်လွင်အောင် ရိုက်ပြသွားသော ဇာတ်ကားတစ်ကားဟုသာ မြင်ပါသည်။ လုပ်ကြံမှုများ၊ နိုင်ငံရေးပြကွက်များသည် ဒေါ်စုအကြောင်းရိုက်လျှင် မပါမဖြစ်ပါသည့် သဘောမျှသာဖြစ်ပါသည်။

 မစ်ရှဲယိုးအနေဖြင့်လည်း The Lady ကို သရုပ်ဆောင်ဖို့ရာ အတော်ခက်ခဲခဲ့မည်ဖြစ်ကြောင်း သိသာပါသည်။ ရွှေတိဂုံဘုရား အနောက်ဖက်မုဒ်လူထု ဟောပြောပွဲတွင် မြန်မာစကားအတော်များများကို ဝဲတဲတဲလေးနှင့် ပြောသွားသော်လည်း ဟောပြောသည့် အသံနေအသံထားမျိုး ဖြစ်အောင်သရုပ်ဆောင်သွားသည်ကို ချီးကျူးမိပါသည်။ 

ဒေါ်အောင်ဆန်းစုကြည်၏ ခင်ပွန်းနှင့် သားနှစ်ယောက်

The Lady တွင် တွေ့ရသော နိုဗယ်ဆုပေးပွဲ မြင်ကွင်း

 

 

 

 

 

 

 

 

 

 

 

 

 

မစ်ရှဲယိုး မြန်မာပြည်ကိုလာ၍ ဒေါ်စုဆီလာတွေ့တော့ ခြံစောင့်က လမ်းပြပေးသည်။ မစ်ရှဲယိုးက သူသိပြီးသားပါဟု ပြောသွားသည်..တဲ့။ သရုပ်ဆောင်ဖို့ ဆက်တင်လုပ်ထားသည့်အိမ်က ဒေါ်စု၏ တကယ့်အိမ်နှင့် တစ်ပုံစံတည်းဖြစ်သောကြောင့်ဟု ဆိုပါသည်။ ဒေါ်စုနှင့်တူရန် ကိုယ်အလေးချိန်လျော့ချထားသော မစ်ရှဲယိုးသည် ဒေါ်စု၏ နူးညံ့သော၊ ပြတ်သားသော၊ ရဲရင့်သော စရိုက်များကို အတတ်နိုင်ဆုံး အကောင်းဆုံး သရုပ်ဆောင်သွားပါသည်။ ဒေါ်စု၏ သားအငယ် ကင်မ်အဲရစ် (ထိန်လင်း) အဖြစ် သရုပ်ဆောင်သော လူငယ်လေးကိုလည်း အတော်သဘောကျပါသည်။ ကင်မ်၏ပုံစံသည် ငယ်စဉ်က ဤသို့ပင်ရှိလိမ့်မည်ဟု ခန့်မှန်းရပါသည်။ နိုဗယ်ဆုပေးပွဲအချိန်တွင် BBC မှ သတင်းနားထောင်နေသော ဒေါ်စု၊ သားကြီးဖြစ်သူ Alexander ၏ အသံကို ကြားရသောအချိန် ခံစားမှုမျက်နှာ၊ နားထောင်နေစဉ် မီးပျက်သွား၍ ဓါတ်မီးထဲမှ ဓါတ်ခဲကိုထုတ်ကာ ရေဒီယိုနားထောင်ရပုံ၊ နိုဗယ်ဆုပေးအပ်ပြီး တီးဝိုင်းမှ တီးခတ်ချိန်၊ ဒေါ်စုမှ မျက်ရည်ကျရင်း စန္ဒယားတီးသောအခန်းတွင် ကျွန်တော်ရင်ထဲဆို့သွားသည်။ ဘေးမှ အသံကြား၍ ကြည့်မိတော့ ကျွန်တော့်ဘေးမှ ဥရောပသူအမျိုးသမီးတစ်ဦး မျက်ရည်တွေဝဲရင်း ကြည့်နေသည်ကို တွေ့လိုက်ရပါသည်။ နားလည်မှုအပြည့်ပေးနိုင်စွမ်းသော ခင်ပွန်းသည် မိုက်ကယ်အဲရစ်ဆုံးသွားကြောင်း ကြားသိရသောအခန်းတွင်လည်း ဒေါ်စုနှင့် လိုက်ပါစိတ်ထိခိုက်ရပါသည်။

ကောင်းတာတွေပြောပြီး မကောင်းသောအချက်များကို ပြောပါမည်။ မကောင်းတာတွေ၊ အားနည်းချက်တွေကတော့ အများကြီးဟု ပြောရမည်။ ဖြစ်ရပ်မှန်ကို သိမှီထားသော မကျေနပ်သူတွေအတွက် မကျေနပ်စရာဖြစ်ရုံမက သပိတ်ပါမှောက်ရမည့်ပုံ ဖြစ်သည်။ စ စချင်း ဒေါ်ခင်ကြည်ထွက်လာကတည်းက စ မှားပါသည်။ ဒေါ်ခင်ကြည်ဝတ်ထားသော ဒီဇိုင်းက မြန်မာဒီဇိုင်းမဟုတ်။ ထိုင်းရိုးရာဝတ်စုံ ဖြစ်ပါသည်။ ကျွန်တော်သိသော နိုင်ငံခြားသားအများစု မှားတတ်တာလည်း ဒါပဲဖြစ်သည်။ ထိုင်းနှင့် မြန်မာအတူတူဟု ထင်နေသည့်ကိစ္စဖြစ်သည်။ ဗိုလ်ချုပ်ကို လုပ်ကြံသည့်အခန်းကလည်း အဖြစ်ထည့်ထားခြင်းကြောင့်လော မသိ။ သာမာန် အက်ရှင်ကားတစ်ကား၏ ဇာတ်ဝင်ခန်းနှင့် တူနေသည်။ ခပ်မိုက်မိုက်ပင် ဝင်လာ၍ ဒိုင်း..ညောင့် သွားသည်။ စဉ်းစား၍ မရသည်က ဤဇာတ်ကားတွင် ပါဝင်သော မြန်မာတွေ အတော်များများရှိပါလျက် ဘာမှ မပြောပြကြဘူးလား မသိပါ။ သို့တည်းမဟုတ် ပြောပါလျက် ဒါရိုက်တာက လက်မခံဘူးလား မသိပါ။ သို့တည်းမဟုတ် သူတို့ကိုယ်၌က ဗိုလ်ချုပ်ကျဆုံးပုံကို မကြားဖူးကြတာလား မသိ။ တကယ်တော့ ဗိုလ်ချုပ်နှင့် ပါတ်သက်သမျှ အတော်များများ You Tube တွင် အလွယ်တကူ ရှာနိုင်ပါသည်။ အဟောင်းလေးကို Copy, Paste လုပ်လိုက်လျှင်တောင် အတော်အပြောလွတ်နိုင်ပါသည်။

ဒါရိုက်တာသည် ဦးနေဝင်းနှင့် ဦးသန်းရွှေကိုလည်း ကွဲပြားပုံမပေါ်။ ဒေါက်တာမောင်မောင်ကိုလည်း အရပ်သားမှန်းသိဟန်မတူ။ အားလုံးကို စစ်တပ်ကချည်းဟု ယူဆထားပုံပေါ်သည်။ ဒေါ်စုနှင့် မိုက်ကယ်အဲရစ် NLD မှ လူများရှေ့တွင် နမ်းရှုပ်သော အခန်းမျိုးသည် အတော်ဂွကျပြီး ဆဲချင်စရာကောင်းသည့် ပြကွက်ဖြစ်သည်။ Hollywood ရုပ်ရှင်များ ထုံးစံအတိုင်း ပါနေကျ အချို့အခန်းတွေ ထည့်မရိုက်လိုက်တာဘဲ ကျေးဇူးတင်ရပါသည်။ ဒါရိုက်တာအနေနှင့်တော့ အနောက်တိုင်းထုံးစံအရ ထွေထွေထူးထူး တွေးမိပုံမရ။ ပုံမှန် ဖြစ်ရိုးဖြစ်စဉ် ရိုက်ရိုးရိုက်စဉ် ပြကွက်မျိုး ထည့်သွင်းလိုက်ပုံ ပေါ်သည်။ သို့သော် ပါဝင်သူ မြန်မာများက ထောက်ပြဖို့ကောင်းပါသည်။ မြန်မာတွေအတွက် လူကြားသူကြားထဲ နမ်းရှုပ်ခြင်းသည် ဟီရိသြတပ္ပကင်းမဲ့ရာ ရောက်သည်ကို နိုင်ငံခြားမှာ အနေကြာ၍ မေ့သွားကြသလား မသိပါ။ တိတိကျကျကို ပြောသင့် တားသင့်သည့် ကိစ္စများဖြစ်သည်။ မဖြစ်သင့်သည့် အမှားများ ဖြစ်ပါသည်။ ဒါရိုက်တာက နိုင်ငံခြားသားမို့ မသိလျှင်တောင် မြန်မာတွေက ပြောသင့်သည်။

ကိုဇာဂနာအဖြစ် သရုပ်ဆောင်သော ပုဂ္ဂိုလ်ကိုလည်း ပြောချင်ပါသည်။ ကိုဇာဂနာ၏ ကမ္ဘာကျော်၊ နိုင်ငံကျော် ပျက်လုံးတွေ အများကြီး ရှိပါလျက် တစ်ခုတစ်လေမျှ မပြောပဲ အရည်မရ အဖတ်မရ ပေါက်ကရပြော၍ ဝိုင်းရယ်ကြခြင်းသည် ဘယ့်နှာကြီးမှန်းမသိပါ။ ပြောစရာ Dialogue တော်တော်ဆင်းရဲပုံ ပေါ်သည်။ ကိုဇာဂနာကို နိုင်ငံရေး လူရွှင်တော်မဖြစ်ဘဲ ပေါကြောင်ကြောင်ဖြစ်အောင် သရုပ်ဆောင်ပြသွားပါသည်။ တော်တော်ကြီးကိုဆိုးပါသည်။ အခြားကျွန်တော် မပြောတတ်သည့်၊ မမြင်သည့်၊ မမှတ်မိသည့့်် အချက်များ အများကြီး ကျန်နိုင်ပါသေးသည်။

ဒါရိုက်တာသည် သူ့သဘောနှင့်သူ မည််သည့် မြန်မာအကြံပေးမှ မခေါ်ဘဲ ထင်ရာမြင်ရာ သူခံစားတတ်သလို ရိုက်သည်ဆိုလျှင်တော့ သူ့ကိုပါရိုက်ဖို့ကောင်းသည်။ ရုပ်ရှင်တော့ မဟုတ်။ ဝါးရင်းတုတ်နဲ့ ဖြစ်သည်။ မြန်မာအကြံပေးများ ရှိပါလျက် ဤသို့ဖြစ်သည်ဆိုလျှင်တော့ အနှီအကြံပေးများ ရှက်တတ်လျှင် လဲသေဖို့သာ ကောင်းတော့သည်။ သို့မဟုတ် မြန်မာအကြံပေးတော့ ခေါ်သည်။ မြန်မာဖြစ်လျှင်ပြီးရော ဘယ်ကအရူးမှန်းမသိကို အထင်ကြီးပြီး အကြံပေးခန့်မိသည်ဆိုလျှင်တော့ ဒါရိုက်တာရော ကျွန်တော်တို့ရော ကံဆိုးမိုးမှောင်ကျခြင်း ဖြစ်ပါလိမ့်မည်။ အာဏာရှင်စနစ်၏စရိုက်နှင့် သဘောသဘာဝမှန်သောြ်ငား၊ သရုပ်ဆောင်များ ပီပြင်ကြသော်ငြား ဖေါ်ပြပုံ နည်းလမ်းမဟုတ်သဖြင့် သမိုင်းအချက်အလက်များနှင့် တိုက်ကြည့်မည်ဆိုလျှင် အတော်ချာတူးလန်သော ရုပ်ရှင်ဖြစ်သည်။ သူတို့ နိုင်ငံခြားမှ ပုဂ္ဂိုလ်များအတွက်တော့ Entertainment တစ်ခုမျှသာ ဖြစ်ချင်ဖြစ်နိုင်သော်လည်း မြန်မာတွေအတွက် သမိုင်းတစ်ခုဟု သဘောထားနိုင်သည်ကို ဤဇာတ်ကားဖြစ်မြောက်ရေးအတွက် ပါဝင်သူအားလုံး နားလည်ဖို့ကောင်းပါသည်။ မြန်မာတွေအတွက် သူတို့ချစ်သော ခေါင်းဆောင်အကြောင်းကို ပီပီပြင်ပြင်မှတ်တမ်းတင်တာကိုသာ ကြည့်ချင်ပါလိမ့်မည်။ မပီမပြင်လုပ်လိုက်၍ သိက္ခာကျစရာ ဖြစ်သွားသည်ဆိုလျှင် အတော်ဆိုးပါသည်။ ဖြစ်နိုင်ရာချေ နောက်တစ်ခုကတော့ မြန်မာတွေ အများစုထုံးစံအတိုင်း မှားတာမှန်တာ ဂရုမစိုက်ဘဲ ကိုယ့်လူမျိုးတွေကို ဘယ်သူဘာထင်ထင် ခိုင်းသမျှလုပ်ကြတာလည်း ဖြစ်နိုင်ပါသည်။

မည်သို့ပင်ဆိုစေ The Lady သည် ဖြစ်ရပ်မှန်မဟုတ်ဘဲ ရုပ်ရှင်အနေနှင့် ကြည့်မည်ဆိုလျှင် မစ်ရှဲယိုးနှင့် David Thewlis တို့အနေနှင့် သူတို့ကျရာဇာတ်ရုပ်ကို သူတို့ အကောင်းဆုံးသရုပ်ဆောင်သွားကြတာကို ငြင်းစရာ မရှိပါ။ အခြားဇာတ်ပို့များ၊ ဇာတ်ရံများအားလုံးလည်း ကျရာအခန်းကို ပီပြင်အောင် သရုပ်ဆောင်သွားကြပါသည်။ တကယ်ကို တော်ကြပါသည်။ ခက်သည်က The Lady သည် ရှေးရာဇဝင်ထဲက Lady မဟုတ်။ CNN တွင် မကြာခဏမြင်နေရသည့် သက်ရှိထင်ရှား ခေါင်းဆောင်တစ်ယောက် ဖြစ်သည်။ သမိုင်းစာအုပ်လှန်စရာ မလို။ သမိုင်း ကျွမ်းကျင်စရာ မလို။ ကမ္ဘာကျော် သက်ရှိထင်ရှား ခေါင်းဆောင်တစ်ယောက် ဖြစ်သည်ကို သတိချပ်သင့်သည်။ အချက်အလက် မပါဘဲ ခံစားမှုသက်သက် ကြည့်ကြမည့် သာမာန်ရုပ်ရှင်မဟုတ်။ နိုင်ငံရေးကို အနည်းငယ်မျှ ကြားဖူးနားဝရှိလျှင်ပင် အတော်ကို့ယို့ကားယားနိုင်သည့် ခံစားချက်များကို ပေးမည့်ရုပ်ရှင်ဖြစ်သည်။
( ၈ လေးလုံး ပုံရိပ်များကတော့ အနည်ထိုင်နေသော ခံစားချက်အဟောင်းများ အသစ်ဖြစ်စေသည်ဟု ဆိုပါရစေ။)

ထို့ကြောင့် The Lady ကိုကြည့်ချင်လျှင် ကြည့်ပါ။ အမှတ်တရ ဖြစ်ပါသည်။ ဝေဖန်စရာရှိလည်း ဝေဖန်ကြ ပြောကြရုံပ။ သို့သော် ခံစားချက်အလွန်ပြင်းထန်သူ၊ ယုံကြည်ချက် ပြင်းထန်သူများအတွက် မကြည့်တာပိုကောင်းပါလိမ့်မည်။ အကုသိုလ်အတုံးလိုက်တက်မှာ သေချာလွန်း၍ဖြစ်သည်။ (မြန်မာဒါရိုက်တာကြီးတစ်ယောက်က မြန်မာမင်းသား မင်းသမီးတွေ အများကြီးကို ပက်ပက်စက်စက် သုံး၍ သမိုင်းကို ပက်ပက်စက်စက် ဖျက်ဆီးထားသည့် မြန်မာရုပ်ရှင်ထက်တော့ ပက်ပက်စက်စက် သာပါသည်..ဟု ဖြည့်တွေးလေးတွေး၍ ရုပ်ရှင်အနေနှင့် ခံစားမည်ဆိုလျှင် ကင်မရာအယူအဆ မီးအလင်းအမှောင်မှ စ၍ သရုပ်ဆောင်များအားလုံးကောင်းသော ရုပ်ရှင်ကားကောင်းတစ်ကားဟု မြင်နိုင်ပါသည်။)

လွတ်လပ်စွာ သဘောထားကွဲလွဲနိုင်ပါသည်။ ငြင်းခြင်းခုန်ခြင်းဖြင့် အမုန်းမပွားတန်ရာဟု ယူဆ၍ ဤစာကိုရေးပါသည်။

နိုင်ငံရေးနှင့်ပါတ်သက်လျှင် ကျွန်တော်မသိပါ။ ရုပ်ရှင်တော့ ကြိုက်တတ်ပါသည်။

(သရုပ်ဖေါ်ပုံများကို Google မှ ယူသည်။)